Tag: reception

لندن: شاہی خاندان کے چھوٹے نواب پرنس ہیری اور نوبیاہتا بہو میگھن مارکل نے شادی کے بعد پہلی بار کسی دعوتِ تقریب میں شرکت کی ، نئے جوڑے کا انتہائی سادہ مگر خوبصورت لباس لوگوں کی توجہ کا مرکز بن گیا۔

تفصیلات کے مطابق شاہی خاندان کے چھوٹے نواب اور امریکی اداکارہ کی شادی کے بعد تقاریب کا سلسلہ شروع ہوگیا، پرنس ہیری کے والد چارلس نے نوبیاہتا جوڑے کے اعزاز میں تقریب کا انعقاد کیا جس کا مقصد فلاحی کاموں کے لیے رقم عطیہ کرنا تھا۔

ہفتے کے روز سورج برطانیہ میں اپنی آب و تاب کے ساتھ چمک رہا تھا اور مطلع بالکل صاف تھا کہ اچانک شاہی محل سے نوبیاہتا جوڑے کی باہر آمد ہوئی جو پرنٹ و الیکٹرانک میڈیا سمیت تمام لوگوں کے لیے حیرت کا باعث تھی۔

پرنس ہیری کے والد نے تقریب میں ایسے 6 ہزار سے افراد کو مدعو کیا تھا جو فلاحی کاموں کے لیے عطیات دیتے ہیں تاہم کسی کو بھی اس بات کا علم نہیں تھا کہ یہ عام سی دعوت کچھ دیر بعد بہت خاص ہوجائے گی۔

میگھن مارکل اپنے شوہر کے ہمراہ انتہائی سادہ لباس پہنے محل سے باہر نکلیں اس موقع پر انہوں نے دھوپ سے محفوظ رہنے کے لیے شاہی کیپ بھی لگایا ہوا تھا، نوبیاہتا جوڑا تقریب میں پہنچا تو وہاں چار چاند لگ گئے اور سب ورطہ حیرت میں مبتلا ہوئے۔

اس موقع پر پرنس ولیم کا کہنا تھا کہ  ملکہ برطانیہ کی جانب سے جاری ہونے والے فلاحی کاموں میں ہم سب کو اپنا حصہ ڈالنا چاہیے تاکہ کمزور طبقے کے نظام زندگی کو بہتر سے بہتر بنایا جاسکے، یہ ہماری اخلاقی اور قومی ذمہ داری ہے۔

برطانوی میڈیا کے مطابق نوبیاہتا جوڑے کے اعزاز میں دیگر معززین کی جانب سے بھی تقاریب کا انعقاد کیا جائے گا تاہم شاہی خاندان سے سیکیورٹی خدشات کے پیش نظر ابھی اس کا کوئی پلان جاری نہیں کیا۔

واضح رہے کہ پرنس ہیری اور اُن کی اہلیہ میگھن مارکل شادی کے بعد پہلی بار کسی عوامی مقام پر نکلے تھے، قبل ازیں دونوں کو تین روز قبل ہی لوگوں اور میڈیا نے ایک ساتھ دیکھا تھا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔