آئی ایم ایف نے دنیا کو خبردار کیا ہے کہ سال2023 عالمی معیشت کیلئے مشکل ترین سال ہوگا کیونکہ اس دوران دنیا کی ایک تہائی معیشت کساد بازاری کا شکار رہے گی۔
یہ بات آئی ایم ایف سربراہ کرسٹالینا جارجیوا نے امریکی ٹی وی ’سی بی ایس‘کو انٹرویو دیتے ہوئے کہی، انہوں نے کہا کہ کورونا وائرس کا متوقع پھیلاؤ چین کی معیشت کو بری طرح متاثر کرسکتا ہے۔
بین الاقوامی مالیاتی فنڈ کی منیجنگ ڈائریکٹر نے کہا کہ سال2023گزشتہ سال کے مقابلے میں سے زیادہ مشکل ہونے والا ہے کیونکہ امریکا، یورپ اور چین کو بیک وقت اقتصادی مشکلات کا سامنا کرنا پڑرہا ہے۔
کرسٹالینا جارجیوا نے کہا کہ 40 برس میں ایسا پہلی بار ہونے کا امکان ہے کہ سن 2022 میں چین کی ترقی عالمی نمو کے برابر یا اس سے کم ہوگی، چین میں آنے والے مہینوں میں کرونا وائرس کا متوقع پھیلاؤ بھی اس کی معیشت کو متاثر کرسکتا ہے جس کے علاقائی اور عالمی ترقی دونوں پر منفی اثرات مرتب ہوں گے۔
غیرملکی خبر رساں ادارے کی رپورٹ کے مطابق امریکی معیشت کے بارے میں جارجیوا نے کہا کہ یہ دوسری معیشتوں کے مقابلے میں مختلف ہے اور ہو سکتا ہے کہ یہ معاشی دباؤ سے بچ جائے جس سے دنیا کی ایک تہائی معیشتوں کو نقصان پہنچنے کا امکان ہے۔
کرسٹالینا جارجیوا نے مزید کہا اگر امریکہ میں مارکیٹ کی یہ لچک برقرار رہتی ہے تو امریکہ دنیا کو ایک انتہائی مشکل سال سے گزرنے میں بھر پور مدد کرے گا۔
