اسلام آباد : قومی احتساب بیورو نے چوہدری پرویزالہی اور چوہدری شجاعت حسین کے خلاف پلاٹس خریدنے سے متعلق کیس بند کرنے کی سفارش کردی، نیب کے مطابق دونوں رہنماؤں کیخلاف کوئی ٹھوس شواہد نہیں ملے۔
تفصیلات کے مطابق قومی احتساب بیورو نے احتساب عدالت سے سفارش کی ہے کہ چوہدری پرویزالہی اور چوہدری شجاعت حسین کے خلاف کیس بند کردیا جائے۔
نیب نے ریفرنس دائر کیا ہے کہ دونوں رہنماؤں کیخلاف ایل ڈی اے کے پلاٹس خریدنے کی انکوئری بند کردی جائے، ریفرنس کے مطابق چوہدری برادران کےخلاف ایل ڈی اے سٹی میں پلاٹس کا کیس چل رہا تھا۔
مزید پڑھیں: ناجائز اثاثہ جات کیس، چوہدری برادران نے نیب کو دستاویزات جمع کروا دیں
دونوں رہنماؤں پر28پلاٹس کی غیر قانونی فروخت کا الزام تھا، نیب ریفرنس میں مزید کہا گیا ہے کہ تحقیقات کے دوران معلوم ہوا کہ یہ پلاٹس چوہدری برادران کے ملازم نے خریدے تھے، چوہدری پرویز الہٰی اور چوہدری شجاعت حسین کے خلاف کوئی دستاویزی یا زبانی شواہد نہیں ملے۔
نیب نے اس سے قبل 6 نومبر کو چوہدری برادران کو ناجائز اثاثہ جات کیس میں طلب کیا تھا اور انہیں 50 صفحات پر مشتمل سوالنامہ دیا گیا تھا جس میں چوہدری برادران اور ان کے اہلخانہ کے تمام اثاثہ جات کی تفصیلات طلب کی گئی تھیں جو آج نیب کو جمع کروا دی گئیں۔
یاد رہے کہ چوہدری برادران کے خلاف مذکورہ کرپشن کیس نیب کے 179 میگا کرپشن کیسز میں شامل ہیں جنہیں سنہ 2015 میں درج کیا گیا تھا۔
ذرائع کا کہنا ہے کہ چوہدری برادران پر 2.428 ارب کے غیر قانونی اثاثہ جات، آمدن سے زائد اخراجات اور ناجائر بھرتیوں کے الزامات ہیں۔