کراچی : قومی ٹیم میں تینوں فارمیٹس میں کپتانی کے فرائض انجام دینے والے بابر اعظم ون ڈے کرکٹ میں ویرات کوہلی کا ایک اور ریکارڈ توڑنے کے قریب پہنچ گئے۔

پاکستان، بھارت، سری لنکا، بنگلہ دیش اور افغانستان میں پچھلی چند دہائیوں میں کچھ غیرمعمولی اور مایہ ناز کرکٹرز پیدا ہوئے ہیں۔

اس حوالے سے ان دنوں بہت سارے شائقین ویرات کوہلی کو عہد جدید کا سب سے بڑا بلے باز سمجھتے ہیں، تقریباً ہر آنے والا بلے باز کوہلی کے جیسی کارکردگی دکھانے کی کوشش کرتا ہے۔

اس کے علاوہ پاکستان میں بابر اعظم ایسا کھلاڑی ہے جسے شائقین کرکٹ ایک بہترین بیٹسمین کے طور پر مانتے ہیں جو ویرات کوہلی کی بیٹنگ سے کافی حد تک مماثلت رکھتا ہے۔ تینوں فارمیٹس کی کپتانی میں بھی بابر اعظم بہت مستقل مزاج رہے ہیں۔

اس مضمون میں ہم ویرات کوہلی کے اس ریکارڈ کا احاطہ کریں گے کہ جس میں امید ہے کہ مستقبل قریب میں بابر اعظم اسے توڑ سکتے ہیں۔

بابر اعظم نے پاکستان کرکٹ ٹیم کے لئے77 ون ڈے میچ کھیلے ہیں۔26 سالہ بلے باز نے55،94 کی عمدہ بلے بازی اوسط سے مجموعی طور پر3،580 رنز بنائے ہیں۔ بابر نے اب تک 75 ون ڈے اننگز میں12 سنچریاں اور 16نصف سنچری ریکارڈ کی ہیں۔

اس کے علاوہ ون ڈے میں بابراعظم کا اسٹرائیک ریٹ87.90 ہے۔ یہ اعداد و شمار اس بات کی جانب اشارہ کرتے ہیں کہ وہ ون ڈے فارمیٹ میں 8 ہزار رنز بنانے والے سب سے تیز بلے باز ہونے کا ویرات کوہلی کا ریکارڈ توڑ سکتے ہیں۔

ویرات کوہلی نے یہ ریکارڈ جون2017 میں حاصل کرلیا تھا، بھارتی کرکٹ ٹیم کے کپتان نے 8 ہزار رنز کے سنگ میل کو چھونے کے لئے175 اننگز کھیلیں۔

بابر اعظم کو اگلی 99 اننگز میں ویرات کوہلی کے ریکارڈ کو توڑنے کے لئے4،420 رنز درکار ہیں۔ اگر بابر اعظم اپنی موجودہ اوسط 55.94 کو برقرار رکھتے ہوئے مقرہ رنز بناتے ہیں تو ویرات کوہلی کا یہ ریکارڈ آسانی سے توڑ سکتے ہیں۔

ون ڈے کرکٹ میں بابر اعظم کی حالیہ پرفارمنس پر نظر ڈالی جائے تو بہت زیادہ امکان ہے کہ وہ 175 ون ڈے اننگز میں8،000 رنز کے سنگ میل کو چھولیں گے۔