شام کے اوقات میں لگنے والی ہلکی پھلکی بُھوک مٹانے کیلئے اکثر لوگ ریفرشمنٹ کا سہارا لیتے ہیں، جو کسی زیادہ فائدہ مند تو نہیں لیکن اس کے مضر اثرات صحت پر پڑ سکتے ہیں۔
لیکن اگر آپ بے وقتے کی بھوک سے پریشان ہیں تو فکر نہ کریں اس کا بہترین حل ماہرین صحت کے پاس ہے جس پر عمل کرکے آپ جسم کیلئے ضروری غذائیت حاصل کرسکتے ہیں۔
اے آر وائی نیوز کے پروگرام باخبر سویرا میں ماہر غذائیت رمشا صدیقی نے اس حوالے سے ناظرین کو مفید مشوروں سے آگاہ کیا۔
انہوں نے بتایا کہ ہمیں اکثر ایسا محسوس ہوتا کہ ہمیں بھوک لگ رہی ہے جبکہ اس بات کا تعلق ہمارے پیٹ سے نہیں دماغ سے ہوتا ہے، اس بھوک کو مٹانے کیلئے اگر ہم ایسی اشیاء کھائیں جن میں غذائیت نہ ہو تو وہ اشیاء موٹاپے کا سبب بنتی ہیں۔
ان کا کہنا تھا کہ اگر ہم اپنے شب و روز قدرتی اوقات کے مطابق نہیں گزاریں گے یعنی رات جلدی سونا یا صبح جلدی اٹھنا پر عمل نہیں کریں گے تو ہمارے ہارمونز متاثر ہوتے ہیں جو مختلف امراض اور تکالیف کا باعث بنتے ہیں۔
رمشا صدیقی نے بتایا کی کھانے کو مناسب وقت اور مناسب مقدار میں کھانا بہت ضروری ہے۔ اور جن کھانوں کو اپنی غذا میں شامل رکھنا ہے اس میں فائبر اور پروٹین والی اشیاء ینی چاہیئیں تاکہ جسم کو وہ غذائیت مل سکے جو اس کی ضرورت ہے۔
