اسلام آباد: ریحام خان کے ڈرائیور سے گاڑی چھیننے کے واقعے کا مقدمہ درج کرلیا گیا ، جس میں بتایا گیا موٹر سائیکل سواروں نے 2 بارگاڑی روک کر اتارنے کی کوشش کی۔

تفصیلات کے مطابق ریحام خان کے ڈرائیور سے گاڑی چھیننے کی کوشش کے واقعے کی ایف آئی آر تھانہ شمس کالونی میں درج کرلی گئی ، ایف آئی آر ریحام خان کے پرسنل سیکرٹری بلال عظمت کی مدعیت میں درج کی گئی۔

ایف آئی آر میں کہا گیا کہ گزشتہ رات راولپنڈی سے اسلام آباد آتے ہوئے دو مسلح موٹر سائیکل سواروں نے 2 بارگاڑی روک کراتارنے کی کوشش کی، واقعہ سے قبل ریحام خان نے گاڑی تبدیل کی تھی۔

درخواست میں مدعی بلال عظمت نے کہا کہ کسی سے کوئی دشمنی نہیں ہے اور گاڑی روک کر ریحام خان کوڈرانے اور پیغام دینے کی کوشش کی گئی۔

اس حوالے سے ریحام خان نے سماجی رابطے کی ویب سائٹ ٹوئٹر پر اپنے بیان میں کہا کہ وہ ایک شادی میں شرکت کے بعد واپس آئیں اور کچھ دیر پہلے ہی گاڑی تبدیل کی تھی ، جس کے بعد آئی جے پی روڈ پر اُن کے ڈرائیور اور سیکریٹری کے ساتھ یہ واقعہ پیش آیا۔

لندن: پی ٹی آئی چیئرمین عمران خان کی سابق اہلیہ ریحام خان کا کہنا ہے کہ سیاسی جماعتوں کا ایک طبقہ کتاب سے خوفزدہ ہے۔

ان خیالات کا اظہار انھوں نے ایک بھارتی ٹی وی کو انٹرویو دیتے ہوئے کیا۔ ریحام خان کا کہنا تھا کہ میری کتاب کسی انتقام کا حصہ نہیں۔

ریحام خان نے دعویٰ کیا کہ کتاب ابھی مکمل نہیں ہوئی، اس پرکام جاری ہے، اس ضمن میں گمراہ کیا جارہا ہے۔ ان کا مزید کہنا تھا کہ ایک طبقہ میری کتاب سے خوفزدہ ہے، کتاب کے مبینہ اقتباس پی ٹی آئی نے افشا کیے۔

ریحام خان نے سوال کیا کہ پی ٹی آئی بتائے، میری کتاب کےاقتباسات کیسے حاصل کیے گئے، انھیں اس کا جواب دینا ہوگا۔

ریحام خان کا مزید کہنا تھا کہ کتاب اس لئےلکھی تاکہ لوگوں کو الیکشن سے پہلے حقیقت کاعلم ہو۔

یاد رہے کہ ریحام خان کی کتاب کے مبینہ اقتباسات سوشل میڈیا پر گردش میں ہیں، جن کے باعث کتاب نے متنازع شکل اختیار کر لی ہے۔

پی ٹی آئی کی جانب سے اس پر شدید تنقید کرتے ہوئے ہرجانے کا دعویٰ کیا گیا، دوسری جانب ریحام خان نے بھی پی ٹی آئی پر کتاب چوری کرنے کا الزام عائد کیا ہے۔

ریحام خان نے چند روز قبل بھی بھارتی ٹی وی چینلز کو انٹرویوز دیے تھے، جن میں عمران خان پر اقربا پروری اور جنسی ہراسگی کے سنگین الزامات عائد کیے گئے تھے۔

ریحام خان کی کتاب میں لگائے گئے الزامات پر جمائما کا غضب ناک ٹوئٹ

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔