اسلام آباد: پاکستان تحریک انصاف کے سربراہ عمران خان کا کہنا ہے کہ وہ اپنی سابقہ اہلیہ کی بے پناہ عزت کرتے ہیں اوران کے خلاف کوئی بات نہیں سن سکتے۔
واضح رہے کہ پاکستان تحریک انصاف کے سربراہ عمران خان اور ان کی سابق اہلیہ ریحام خان نے تقریباً 10 ماہ شادی کے بندھن میں بندھے رہنے کے بعد گزشتہ دنوں باہمی رضا مندی سے علیحدگی اختیار کی ہے۔
عمران خان نے صحافی سے بھی معذرت کی جسے دو روز قبل انہوں نے ریحام خان سے متعلق پوچھے گئے سوال پرانتہائی توہین آمیز رویے کا اظہارکیا تھا۔
ان کا کہنا تھا کہ میں صحافیوں کی بہت عزت کرتا ہوں تاہم ریحام کے خلاف کوئی بات نہیں سن سکتا، صحافی کے اچانک سوال پرغصہ آگیا تھا۔
تحریک انصاف کے سربراہ کایہ بھی کہنا تھا کہ کسی بھی گھر میں طلاق موت کی طرح کا سانحہ ہوتی ہے اسی سبب صحافی کے ساتھ ایسے رویے کا اظہار کرگیا۔
عمران خان نے سیاسی معاملات پر گفتگو کرتے ہوئے کہا کہ ملک میں 1970 کے بعد سے شفاف انتخابات نہیں ہوئے، صاف وشفاف الیکشن کرانا ہی اصلی جمہوریت ہے۔
ان کا یہ بھی کہنا تھا کہ ملک میں میٹروز بن رہی ہیں لیکن عوام کو پینے کے لئے صاف پانی نہیں مل رہا ہے۔
2013تحریک انصاف کے سربراہ نے ایک بار پھراپنا موقف بھی دہرایا کہ 2013 کاالیکشن ملک کا سب سے زیادہ دھاندلی زدہ الیکشن تھا۔
