ریکوڈک منصوبہ خوش حال بلوچستان کا ضامن پاکستان کا ایک اہم ترین منصوبہ ہے، ریکو ڈک ٹیٹھیان بیلٹ کا ایک ارضیاتی خطہ ہے، اور اس کا شمار دنیا کے تانبے اور سونے کے بڑے ذخائر میں ہوتا ہے۔

ریکوڈک کے پاس 5.87 بلین ٹن تانبے اور 42 ملین اونس سونے کے ذخائر ہیں، اس منصوبے کی تنظیم نو کا کام دسمبر 2022 میں پایہ تکمیل کو پہنچ چکا ہے، جو ریکوڈک کو بین الاقوامی معیار کا طویل المدتی منصوبہ بنانے کی طرف پہلا قدم ہے۔

اس سے بیرک کے تانبہ نکالنے کے پورٹ فولیو میں نمایاں اضافے ہوگا اور آنے والی نسلیں اس سے مستفید ہو سکیں گی، بیرک پراجیکٹ 2010 کی فزیبلٹی رپورٹ 2011 میں کی جانے والی پراجیکٹ توسیع کی فزیبلٹی رپورٹ کو اپڈیٹ کر رہی ہے، جو 2024 تک مکمل ہو جائیں گی اور 2028 تک باقاعدہ کان کنی کے آغاز کا ہدف مقرر کیا گیا ہے۔

ریکوڈک کان کی عمر 40 سال ہوگی اور آن سائٹ پراسیسنگ سے اعلیٰ معیار کے تانبے اور سونے کا کنسنٹریٹ حاصل کیا جائے گا، آن سائٹ پراسیسنگ سے سالانہ 80 ملین ٹن خام دھات کی پراسیسنگ کی جا سکے گی۔

ریکوڈک منصوبہ نہ صرف پاکستان کی معیشت کی ترقی میں اہم کردار ادا کرے گا، بلکہ ملک کے پس ماندہ صوبے بلوچستان میں ترقی کا نیا باب کھولے گا، معاشی فوائد کے علاوہ روزگار کے مواقع پیدا ہوں گے، اس منصوبے سے مقامی معیشت کو فروغ ملے گا اور کان میں صوبائی شراکت داری کو مکمل تحفظ حاصل ہوگا، بلوچستان کو کسی بھی قسم کی مالیاتی سرمایہ کاری کیے بغیر 35 فی صد منافع، رائلٹی، ڈیوڈنڈ اور دیگر مراعات حاصل ہوں گی۔

تانبا قابل تجدید توانائی کی ٹیکنالوجیز جیسے سولر پینلز، ونڈ ٹربائنز اور الیکٹرک گاڑیوں کا ایک اہم جزو ہے، اس منصوبے سے پاکستان کو موسمیاتی تبدیلی سے متعلق پیرس معاہدے کے تحت اپنے وعدوں کو پورا کرنے میں بھی مدد ملے گی۔

ریکوڈک بلوچستان کے لیے اپنی معیشت اور معاشرے کو تبدیل کرنے کا سنہری موقع ہے، یہ منصوبہ بلوچستان کو ایک خوش حال اور پرامن صوبہ بنانے کی صلاحیت رکھتا ہے، یہ منصوبہ پاکستان کی ترقی اور استحکام میں مثبت کردار اداکرے گا۔

اسلام آباد: پاکستان معاشی پرواز کے لیے بھرپور طور پر تیار ہو چکا ہے، ریکوڈک اور دیگر مائن اور منرلز منصوبوں پر کام کرنے والے متعلقہ حکام کے اہم پیغامات نے اس تیاری پر روشنی ڈالی ہے۔

چیف ایگزیکٹو آفیسر بیرک نے اپنے پیغام میں کہا ہے کہ ریکوڈک ذخائر دنیا کے وسیع پیمانے پر دریافت کیے گئے کاپر اور گولڈ کے ذخائر ہیں، اور پاکستان قدرتی خزانوں اور معدنیات سے مالا مال سرزمین ہے۔

مسٹر مارک برسٹو کا کہنا تھا کہ منصوبے کے تحت پاکستان بالخصوص بلوچستان میں ملکی اور غیر ملکی سرمایہ کاری کو بے انتہا فروغ ملے گا، میں حکومت پاکستان اور بلوچستان کے ساتھ مشترکہ سرمایہ کاری کے فروغ اور منصوبوں پر کام کر رہا ہوں۔

منیجنگ ڈائریکٹر جی ایچ پی ایل مسعود نبی نے کہا پاکستان میں معدنیات کثیر تعداد میں ہیں بلکہ ملک میں غیر ملکی سرمایہ کاری کی کشش کا باعث ہیں، معدنیات کے استعمال کو صحیح طور پر بروئے کار لانے کے لیے ہم ایک تاریخی منرل سمٹ کا انعقاد کرنے جا رہے ہیں۔ انھوں نے مزید کہا ملکی اور بین الاقوامی سرمایہ کاروں کے فروغ کے لیے یہ سمٹ ایک بہترین پلیٹ فارم ہوگا، جس میں معدنی وسائل سے متعلق بات چیت بھی کی جائے گی۔

زمین کی گہرائیوں سے چمکتے ہوئے خزانے، پاکستان کے لیے روشن مستقبل کی نوید

کنٹری منیجر ریکوڈک مائننگ کمپنی علی احسان کا کہنا تھا کہ حکومتِ پاکستان یکم اگست کو پاکستان منرل سمٹ کا انعقاد کرنے جا رہی ہے، ایس آئی ایف سی کے زیر اہتمام یہ پہلا سمٹ ہے جس میں ہمارا بھر پور تعاون موجود ہے۔

سینیٹر مصد ق ملک نے کہا یکم اگست کو اسلام آباد میں معدنیات کی اہمیت اور ان کے فروغ سے متعلق سمٹ کر رہے ہیں، جس میں دنیا بھر بالخصوص یو اے ای، سعودی عرب اور دیگر ممالک سے سرمایہ کاروں کی شرکت ہوگی، انھوں نے کہا دنیا میں ایک خاموش انقلاب آ رہا ہے، اس انقلاب کا گہرا تعلق نادر اور نایاب معدنیات اور ذخائر سے منسلک ہے۔