محکمہ موسمیات کا کہنا ہے کہ کراچی سمیت ملک بھر میں عید کی تعطیلات کے دوران موسم شدید گرم رہنے کا امکان ہے۔
محکمہ موسمیات کے مطابق 7 سے 12 جون تک ملک بھر میں درجہ حرارت معمول سے زیادہ رہنے کا امکان ہے، اسلام آباد، کشمیر، خیبر پختونخوا میں درجہ حرارت 5 سے 7 ڈگری سینٹی گریڈ بڑھے گا۔
محکمہ موسمیات کا کہنا ہے کہ گلگت بلتستان میں بھی درجہ حرارت 5 سے 7 ڈگری سینٹی گریڈ زائد رہنے کا امکان ہے، جنوبی سندھ، پنجاب اور بلوچستان کے کچھ علاقوں میں درجہ حرارت 4 سے 6 ڈگری سینٹی گریڈ زائد رہنےکا امکان ہے۔
محکمہ موسمیات کا کہنا ہے کہ عید کے 3 دن کراچی میں مطلع جزوی ابرآلود، موسم گرم اور مرطوب رہ سکتا ہے، ان دنوں شہر کا درجہ حرارت 35 سے 37 ڈگری سینٹی گریڈ تک رہنے کا امکان ہے۔
محکمہ موسمیات کا مزید کہنا ہے کہ عید کے دنوں میں سمندری ہوائیں بحال رہنے کا امکان ہے، عید کے دوسرے دن تیز ہوائیں چل سکتی ہیں، ہواؤں کی رفتار 35 سے 40 کلو میٹر فی گھنٹہ تک پہنچ سکتی ہے۔
محکمہ موسمیات نے شدید گرمی کی وارننگ جاری کرتے ہوئے متعلقہ اداروں کوالرٹ رہنےکی ہدایت کی ہے۔
https://urdu.arynews.tv/karachi-weather-and-rain-update/
