دبئی(4 اگست 2025): یو اے ای روڈز اینڈ ٹرانسپورٹ اتھارٹی (آر ٹی اے) نے نئے ڈرائیونگ لائسنس کے اجرا اور لرننگ پرمٹ سے متعلق نئی فیسوں کا اعلان کیا ہے۔
عرب میڈیا کے مطابق موٹر سائیکل، لائٹ وہیکل اور لائٹ آٹومیٹک گاڑیوں کے لیے لرننگ پرمٹ کی فیس 100 درہم مقرر کی گئی ہے جبکہ لائٹ اور ہیوی بسوں، مکینیکل مشینری اور ہیوی گاڑیوں کے لیے فیس 200 درھم ہو گی۔
محکمہ ٹریفک میں فائل کھولنے پر 200 درہم، سیف ڈرائیونگ گائیڈ فیس 50 درہم اور آئی ٹیسٹ کے لیے کم از کم 140 اور زیادہ سے زیادہ 180 درہم فیس مقرر کی گئی ہے۔
اس کے علاوہ ہر درخواست گزار کو 20 درہم انوویشن اور نالج فیس بھی ادا کرنا ہو گی، ڈرائیونگ لائسنس کے اجرا کے لیے 21 سال سے کم عمر افراد سے 100 درہم جبکہ 21 سال یا اس سے زیادہ عمر کے افراد سے 300 درہم فیس وصول کی جائے گی جس میں 20 درہم انوویشن فیس شامل ہے۔
روڈز ٹرانسپورٹ اتھارٹی کا کہنا ہے کہ اگر کوئی درخواست گزار ڈرائیونگ لائسنس کی کیٹگری کو مینول سے آٹو میٹک یا آٹو میٹک سے مینول میں تبدیل کرنا چاہے تو 200 درہم اضافی فیس اور 20 درہم انوویشن چارجز ادا کرنا ہوں گے۔