لاہور : تفتیشی اداروں نے سانحہ9مئی، دہشت گردی کے5اہم مقدمات کی تفتیش کی مکمل رپورٹ اعلیٰ حکام کو روانہ کردی۔
،تفتیشی رپورٹ میں بتایا گیا ہے کہ دہشت گردی کی دفعات کے تحت تھانہ سرور روڈ میں 5مقدمات درج ہیں جن کی تفتیش انسپکٹر رینک کے افسران کررہے ہیں۔
رپورٹ کے مطابق دہشت گردی کے5مقدمات میں 430ملزمان کو گرفتار کیا گیا، 2افراد قتل، 64پولیس اہلکاروں کو زخمی کرنے کا الزام مقدمات میں شامل ہے۔
سانحہ 9 مئی کے ان مقدمات میں 49ملزمان نامزد ہیں،51کو ویڈیو فوٹیج سے شناخت کرکے پکڑا گیا، 330نامعلوم افراد کی گرفتاری دہشت گردی کے مقدمات میں کی گئی۔
اس کے علاوہ 74ملزمان کو شناخت پریڈ کے بعد ڈسچارج کردیا گیا، کینٹ ڈویژن میں دیگر دفعات کے تحت 27 مقدمات درج کیے گئے، تمام مقدمات کی تفتیش ابھی بھی جاری ہے۔
سانحہ 9 مئی کیس : شاہ محمود اور اسد عمر نے بیان ریکارڈ کرا دیا
واضح رہے کہ تحریک انصاف کے رہنماؤں شاہ محمود قریشی اور اسد عمر نو مئی کے کیسز میں شامل تفتیش ہوگئے اور ڈی آئی جی انویسٹی گیشن کو بیان ریکارڈ کرادیا۔
شاہ محمود قریشی نے بیان میں کہا کہ سربراہ جے آئی ٹی نے کچھ سوالات کیے اور پوچھا کہ آپ کا کردار کیا رہا، ہمارا کوئی کردار تھا نہ ہی ہم ملوث ہیں، تفتیش کے سوالات اور نکات کو میڈیا پرلانا مناسب نہیں جبکہ اسد عمر کا کہنا تھا کہ پولیس نے نو مئی کے حوالے سے پوچھا جتنی معلومات تھی ہم نے بتادی۔