اسلام آباد : پی ٹی آئی نے حکومت سے مذاکرات کی رپورٹ سپریم کورٹ میں جمع کروا دی، رپورٹ میں مذاکرات کی تفصیلات سے عدالت کو آگاہ کیا گیا ہے۔
تفصیلات کے مطابق پی ٹی آئی کی جانب سے رپورٹ سپریم کورٹ رجسٹرار آفس میں جمع کرائی گئی، مذاکرات میں کب کیا ہوا، تحریک انصاف نے متفرق درخواست کے ذریعے عدالت کو آگاہ کیا۔
پی ٹی آئی کی متفرق درخواست میں بتایا گیا ہے کہ حکومت کے ساتھ مذاکرات کے تین ادوار ہوئے، مذاکرات میں پی ٹی آئی نے ہر ممکن حد تک لچک دکھائی۔
پی ٹی آئی نے حکومت سے مذاکرات کی رپورٹ سپریم کورٹ میں جمع کرادی#ARYNews pic.twitter.com/a5OwSDNY5a
— ARY NEWS (@ARYNEWSOFFICIAL) May 3, 2023
اس کے علاوہ متفرق درخواست میں گزشتہ رات ہونے والے مذاکرات کے تیسرے دور کی پیشرفت کی تفصیلات بھی شامل ہیں۔
پاکستان تحریک انصاف کے رہنما فواد چوہدری نے کہا ہے کہ پنجاب اسمبلی کے انتخابات سے متعلق سپریم کورٹ اپنے حکم پر عمل درآمد کروائے۔
تحریک انصاف آج سپریم کورٹ میں PDM اتحاد سے مذاکرات کی تفصیلی رپورٹ جمع کروا رہی ہے، استدعا کی جا رہی ہے کہ پنجاب اسمبلی کے انتخابات سے متعلق سپریم کورٹ اپنے حکم پر عملدرآمد کروائے
— Ch Fawad Hussain (@fawadchaudhry) May 3, 2023
دوسری جانب پی ٹی آئی کی رہنما شیریں مزاری نے اپنے ٹویٹ میں کہا ہے کہ میڈیا نے مذاکرات کی ناکامی پر پی ٹی آئی کے مؤقف کو توڑ مروڑ کر پیش کیا۔
مذاکرات میں ہمارا مؤقف یہ تھا کہ اگر 14 مئی تک اسمبلیاں تحلیل ہو جائیں تو پی ٹی آئی تمام انتخابات ایک دن پر رضا مند ہوجائے گی لیکن پی ڈی ایم نے اتفاق نہیں کیا۔
یاد رہے کہ گزشتہ رات وفاقی حکومت اور پی ٹی آئی کے درمیان مذاکرات کا تیسرا دور ختم ہوا جس کے بعد میڈیا سے گفتگو کرتے ہوئے شاہ محمود قریشی نے بتایا کہ حکومتی ٹیم کے ساتھ مذاکرات میں ان باتوں پر اتفاق ہوگیا ہے کہ ملک بھر میں ایک ہی دن انتخابات ہونے چاہئیں۔
انہوں نے کہا کہ نگراں حکومت کے ماتحت شفاف الیکشن ہوں تاکہ کل اس پر کوئی انگلی نہ اٹھا سکے، ہمارا اس بات پر اتفاق نہیں ہو سکا کہ عام انتخابات کس دن ہوں۔