لاہور : ڈی سی او لاہور محمد عثمان نے کہا ہے کہ سانحہ سندر ریسکیو آپریشن مکمل کرلیا گیا ہے،سانحہ میں پینتالیس افراد جاں بحق جبکہ ایک سو تین افراد کو زندہ بچالیا گیا ہے۔
تفصیلات کے مطابق لاہور میں سندرانڈسٹریل اسٹیٹ میں ہونے والے حادثے میں زندگی کی امیدیں دم توڑ گئیں ۔
سانحہ سندر ریسکیو آپریشن ایک سو اکتیس گھنٹے بعد مکمل کرلیا گیا۔ میڈیا سے گفتگو میں ڈی سی او لاہور محمد عثمان نے ریسکیو آپریشن مکمل ہونے کااعلان کردیا۔
ڈی سی او نے کہا کہ سندرآپریشن اپنی نوعیت کا بڑاآپریشن تھا،جس میں سترہ ہزار ٹن سے زائد ملبے کو ہٹایا گیا ۔
ایک سوال کے جواب میں ان کا کہنا تھا کہ سانحے میں ملوث ذمہ داروں کوہرگز نہیں چھوڑا جائے گا۔
اس موقع پر ڈی جی ریسکیو کا کہنا تھا کہ کم سے کم وقت میں زیادہ سے زیادہ لوگوں کو بچانا ریسیکو ڈبل ون ڈبل ٹو کی بڑی کامیابی ہے۔
واضح رہے کہ فیکٹری کا ملبہ ہٹانے کے لئے امدادی کارروائیاں چھ روز جاری رہیں، جائے وقوعہ پر پاک فوج، ریسکیو 1122 ، بحریہ ٹاؤن اور دیگر اداروں کی ٹیمیں امدادی کاموں میں مصروف رہیں اور بھاری مشینری کی مدد سے ملبہ ہٹایا گیا۔
شناخت نہ ہونے والی لاشوں کے ڈی این اے ٹیسٹ کے بعد واضح ہو جائے گا کہ ان کا تعلق کس خاندان سے تھا جبکہ لاپتہ افراد کا بھی تعین کیا جا سکے گا۔
