Tag: rescue team

ریاض : ٹڈی دل سے بچاؤ کا اسپرے کرنے والے طیارے کی ہنگامی لینڈنگ کرنے والے زخمی پائلٹ کو ریسکیو ٹیموں نے16 گھنٹے بعد ڈھونڈ لیا، کپتان کا تعلق سوڈان سے ہے۔

سعودی ذرائع ابلاغ کے مطابق عسیر ریجن میں ٹڈی دل کے اسپرے کے لیے آنے والا ایک انجن کا طیارہ دوران پرواز اچانک خراب ہوگیا، جسے پائلٹ نے کمال مہارت سے ہنگامی طور پر لینڈ تو کرلیا تاہم گرنے کی وجہ سے وہ شدید زخمی ہوکر جھاڑیوں میں لاپتہ ہوگیا۔

ہنگامی لینڈنگ کی اطلاع ملتے ہی ریسکیو ٹیمیں جائے وقوعہ پر پہنچ گئیں، بعد ازاں ریسکیو ٹیموں نے سولہ گھنٹے کی مسلسل کوششوں کے بعد لاپتہ پائلٹ کو تلاش کرلیا۔

طیارے کی ہنگامی لینڈنگ کا یہ واقعہ سعودی عرب کے جنوب مغربی صوبے عسیر میں النماص اور المجاردة کمشنریوں کے درمیان واقع جنگلات میں پیش آیا تھا۔

ریسکیو ذرائع کا کہنا ہے موسم کی خرابی کی وجہ سے حادثہ پیش آیا، ائیر کرافٹ کے کیپٹن کو طبی معائنے کے لیے اسپتال منتقل کردیا گیا ہے، جیہاں اسے طبی امداد فراہم مکی جارہی ہے اور اس کی حالت خطرے سے باہر بتائی جارہی ہے۔

طیارے کے پائلٹ کی ایک وڈیو سوشل میڈیا پر وائرل ہوئی ہے، کپتان کا تعلق سوڈان سے ہے۔ وڈیو میں کپتان کا کہنا ہے کہ اگر جنگلات میں ہنگامی لینڈنگ کا یہ واقعہ کسی اور ملک میں ہوتا تو میں شاید دنیا میں نہیں ہوتا۔ ریسکیو ٹیموں کا شکر گزار ہوں، مجھے ان پر فخر ہے۔

مزید پڑھیں : ٹڈی دل کے اسپرے کے لیے آنے والا طیارہ گر کر تباہ، 2 پائلٹ جاں بحق

یاد رہے کہ گزشتہ ماہ صوبہ پنجاب کے شہر صادق آباد میں بھی ٹڈی دل کے اسپرے کے لیے آنے والا طیارہ باندھی کے قریب گر کر تباہ ہوگیا تھا جس کے نتیجے میں طیارے میں موجود 2 پائلٹ جاں بحق ہوگئے، حادثہ طیارہ فنی خرابی کے باعث پیش آیا، یہ طیارہ وفاق کی جانب سے اسپرے مہم کے لیے پنجاب حکومت کو دیا گیا تھا۔