پاکستان شوبز انڈسٹری کی معروف اداکارہ ریشم زندگی کے بڑے خواب کا تذکرہ کردیا ساتھ ہی مداحوں سے دعا کی درخواست بھی کردی۔
اداکارہ ریشم فلموں اور ٹیلی ویژن کی ایک بڑی اسٹار ہیں، انہوں نے 1995 میں فلمی کیریئر کا آغاز فلم ’جیوا‘ سے کیا تھا اور ان کی پہلی ہی فلم نے اچھی کامیابی حاصل کی تھی، ریشم کی دیگر مشہور فلموں میں ’چور مچائے شور، گھونگھٹ، سنگم، دوپٹا جل رہا ہے، انتہا، پل دو پل، طوفان، پہلا پہلا پیار اور تڑپ‘ شامل ہیں۔
ریشم نے فلموں کے علاوہ ٹی وی ڈراموں اور سیریلز میں بھی اداکاری کے جوہر دکھائے، ساتھ ہی وہ ماڈلنگ بھی کرتی دکھائی دیں، شاندار پرفارمنس پر انہوں نے متعدد ایوارڈز بھی جیت رکھے ہیں۔
View this post on Instagram
ریشم ایک مخیر حضرات بھی ہیں اور وہ ہمیشہ ضرورت مندوں میں کھانا تقسیم کرتی رہتی ہیں اور وہ خود نیاز پکانا پسند کرتی ہیں جس کی ویڈیو وہ اکثر سوشل میڈیا پر شیئر بھی کرتی ہیں۔
اداکارہ نے حال ہی میں ایک نجی نیوز چینل کے لیے انٹرویو دیا جہاں انہوں نے بڑے پیمانے پر کوکنگ کرنے اور لنگر بانٹنے سے متعلق بھی کھل کر بات کی۔
ریشم نے کہا کہ میری خواہش ہے کہ میں اپنا ذاتی لنگر خانہ کھولوں تاکہ میرے دنیا سے چلے جانے کے بعد میرا لنگر خانہ میرے لیے صدقۂ جاریہ بنے، میں ایک جگہ خرید کر وہاں لنگر خانہ کھولنا چاہتی ہیں۔
اداکارہ نے انٹرویو کے دوران اپنے مداحوں سے بھی اپنی اس خواہش سے متعلق دعا کرنے کی اپیل کی، انہوں نے کہا کہ میری مداحوں سے گزارش ہے وہ میرے لیے دعا کریں تاکہ میں اپنا لنگر خانہ کھول سکوں۔
یاد رہے کہ ریشم کا نام پاکستانی فلم انڈسٹری کے نامور فنکار میں شامل ہوتا ہے، لیکن اب اداکارہ ریشم فلمی دنیا سے کنارہ کیے ہوئے ہیں، 55 سالہ ریشم تاحال شوبز انڈسٹری کے نئے چہروں کو اپنی خوبصورتی سے مات دیتے نظر آتے ہیں۔
