ARYNews.tv | Urdu – Har Lamha Bakhabar

Tag: resume

  • افغانستان میں خواتین ریڈیو پر پابندی ختم کردی گئی

    افغانستان میں خواتین ریڈیو پر پابندی ختم کردی گئی

    افغانستان میں 15 اگست 2021 کو طالبان کے اقتدار میں آنے کے بعد بیشتر میڈیا اداروں نے مختلف عوامل کے باعث اپنی سرگرمیاں بند کرنے کا فیصلہ کیا تھا۔

    غیر ملکی ذرائع ابلاغ کے مطابق طالبان نے ملک میں میڈیا کے لیے انتہائی چیلنجنگ ماحول پیدا کردیا، بشمول سنسرشپ اور معلومات تک رسائی میں مشکلات، دھمکیاں، غیر قانونی گرفتاری اور حراست، بدسلوکی، عدالت کے مقدمات اور قید کا سامنا کرنا پڑتا ہے۔

    طالبان کے اقدامات جو ایڈیٹوریل مواد اور میڈیا اداروں کی داخلی سرگرمیوں میں مداخلت کرتے ہیں، میڈیا کی آزادی پر پابندی کے زمرے میں آتے ہیں۔

    اقوام متحدہ کے امدادی مشن (یو این اے ایم اے) نے 15 اگست 2021 سے 30 ستمبر 2024 تک، افغانستان میں 336 صحافیوں اور میڈیا کارکنوں کے حقوق کی خلاف ورزیوں کے دستاویزات جمع کئے۔

    رپورٹس کے مطابق طالبان حکام پر تنقید کرنے والوں کے خلاف دھمکیاں، غیر قانونی گرفتاریوں اور حراست کا استعمال میڈیا کو خود سنسرشپ پر مجبور کرتا ہے، جس کا اظہار رائے کی آزادی پر منفی اثر پڑتا ہے۔

    افغانستان میں میڈیا اداروں کی سرگرمیوں پر مختلف قسم کی پابندیاں عائد ہیں۔ ان میں ایسی موسیقی یا فلموں کی نشریات پر پابندی شامل ہے جسے شریعت کے خلاف سمجھا جاتا ہے۔

    کچھ صوبوں میں خواتین کو ریڈیو پروگرامز میں کال کرنے کی اجازت نہیں ہے، سوائے ان مسائل کے جو خواتین کی صحت یا مذہبی مسائل پر مبنی ہوں۔

    میڈیا اداروں کے دفاتر میں مرد اور خواتین کو علیحدہ علیحدہ کام کرنا ضروری ہوتا ہے، اور مرد اور خواتین براڈکاسٹرز کو ایک پروگرام میں ایک ساتھ پیش ہونے کی اجازت نہیں ہے۔

    میڈیا کے شعبے سے متعلق نئی پابندیوں میں مخلوقات کی تصاویر بنانے یا دکھانے کی ممانعت، خواتین کی آواز کو اب نجی سمجھنا اور اس کا چھپانا، اور خواتین کو محرم (مرد سرپرست) کے بغیر ٹرانسپورٹ فراہم کرنے کی ممانعت شامل ہیں۔

    اقوام متحدہ میں یوکرین پر نیوٹرل قرارداد پر ووٹنگ آج ہوگی

    21 اگست 2024 کو ”نیکی کے فروغ اور برائی کی روک تھام کے قانون” نے پہلے سے موجود پابندیوں کو قانونی شکل میں منتقل کردیا تھا، ملک میں موجودہ پابندیوں کو مزید بڑھا دیا گیا جبکہ نئی پابندیاں بھی عائد کردی گئیں۔

  • کئی دہائیوں کے بعد سبی اور ہرنائی میں ٹرین چلے گی: خواجہ سعد رفیق

    کئی دہائیوں کے بعد سبی اور ہرنائی میں ٹرین چلے گی: خواجہ سعد رفیق

    لاہور: وفاقی وزیر ریلوے خواجہ سعد رفیق کا کہنا ہے کہ کئی دہائیوں کے بعد سبی اور ہرنائی میں ٹرین چلے گی، گوادر میں ریلوے کی کافی جگہ موجود ہے، گوادرمیں ریلوے کا دفتر کھول دیا گیا ہے۔

    تفصیلات کے مطابق وفاقی وزیر ریلوے خواجہ سعد رفیق کا کہنا ہے کہ پاکستان ریلوے کا مسافروں کی سہولت کے لیے معاہدہ ہوا ہے، معاہدے کے ذریعے جہاں رکاوٹیں تھیں وہ ختم کردیں۔

    وفاقی وزیر کا کہنا تھا کہ اسمارٹ فون ایپ کے ذریعے ٹرین کی ٹکٹ، ہوٹل اور کھانے پینے کی سہولت میسر ہوگی، ایپ کے ذریعے پارسل کی بکنگ اور ٹریکنگ بھی ہو سکے گی، رابطہ ایپ کے ذریعے شہری اپنا سفر آسان بنا سکے گا۔

    انہوں نے کہا کہ ریونیو شیئرنگ کی بنیاد پر یہ سروس ریلوے میں دستیاب ہوگی، یہ ایپ ریلوے کے آپریشنل معاملات کو بہتر بنانے میں اہم قدم ہے۔

    وفاقی وزیر کا کہنا تھا کہ سبی ہرنائی ٹریک اور چیک پوسٹ کو جلد مکمل کیا جائے گا، کئی دہائیوں کے بعد سبی اور ہرنائی میں ٹرین چلے گی، گوادر میں ریلوے کی کافی جگہ موجود ہے، گوادرمیں ریلوے کا دفتر کھول دیا گیا ہے، حالیہ سیلاب سے ریلوے کو بہت نقصان پہنچا ہے۔

    انہوں نے مزید کہا کہ تنخواہوں کے معاملے میں وزارت خزانہ سے بات چیت کی ہے انشا اللہ کوئی حل نکلے گا، ہمیں توقع ہے قسطوں میں ہی صحیح تنخواہوں کے لیے پیسہ ملے گا۔

  • خاتون نے سی وی بھیجتے ہوئے بڑی غلطی کردی، کیا آپ کے ساتھ کبھی ایسا ہوا ہے؟

    خاتون نے سی وی بھیجتے ہوئے بڑی غلطی کردی، کیا آپ کے ساتھ کبھی ایسا ہوا ہے؟

    ملازمت کے لیے بھیجی جانے والی سی وی کو بہت دھیان سے بنانا پڑتا ہے تاکہ کہیں کوئی معمولی سی غلطی ملازمت دینے والے پر آپ کا غلط تاثر نہ چھوڑے، سی وی میں غلطی سے ملازمت ملنے کا امکان کم ہوجاتا ہے۔

    ایسا ہی کچھ ایک خاتون کے ساتھ ہوا جن کی سی وی پر ایک غلطی نے ایک طرف تو انہیں نقصان پہنچایا تو دوسری جانب وہ خود بھی اپنی بے دھیانی دیکھ کر حیران رہ گئیں۔

    میریسا نامی ان خاتون نے گوگل پر دستیاب بنی بنائی سی وی کا ٹیمپلیٹ اٹھایا اور اس میں سے پہلے سے موجود تفصیلات کی جگہ اپنی معلومات لکھ دیں۔

    لیکن وہ دیگر چیزوں کو درست کرنے میں اتنی مصروف رہیں کہ ٹیمپلیٹ میں موجود تصویر ہٹا کر اپنی تصویر لگانا بھول گئیں۔

    مذکورہ تصویر گلے میں اسٹیتھو اسکوپ پہنے ایک ڈاکٹر کی تھی جبکہ خاتون ایک ٹیچر کی اسامی کے لیے اپلائی کر رہی تھیں۔ جب انہوں نے سی وی ارسال کردی تب انہیں احساس ہوا کہ وہ کیا غلطی کر بیٹھی ہیں۔

    اپنی یہ بھول انہوں نے سماجی رابطوں کی ویب سائٹ ٹویٹر پر شیئر کی جس پر صارفین نے مختلف مزاحیہ تبصرے کیے، لوگوں نے ان سے اظہار افسوس بھی کیا۔

  • کویت نے پروازیں بحال کرنے کا اعلان کردیا

    کویت نے پروازیں بحال کرنے کا اعلان کردیا

    کویت سٹی: کویت کی وزرا کونسل نے یکم جنوری سے بین الاقوامی پروازیں بحال کرنے کا اعلان کردیا، کویت میں کرونا وائرس کی صورتحال قابو میں ہے۔

    کویتی میڈیا کے مطابق وزرا کونسل کا وزیر اعظم کویت شیخ صباح الخالد کی زیر صدارت سیف پیلس میں ہفتہ وار اجلاس منعقد ہوا۔

    کونسل کو بتایا گیا کہ عزت مآب شیخ نواف الاحمد کو برادر مملکت سعودی عرب کے بادشاہ کی طرف سے پیغام موصول ہوا جس میں امیر کویت کو خلیج تعاون کونسل رہنماؤں کی مجلس اور اعلیٰ کونسل کے اجلاس میں شرکت کی دعوت شامل ہے۔

    وزرا کی کونسل نے مثبت برادرانہ ماحول پر گہرے اطمینان کا اظہار کیا جو اس سربراہی اجلاس کے ذریعے خلیج کے اتحاد کو مضبوط بنانے اور خلیج تعاون کونسل کے اتحاد کو یکجہتی اور اتحاد کو بڑھانے کی اہمیت میں ذمہ داری اور خلوص عقیدے کی عکاسی کرتا ہے۔

    کابینہ نے دنیا بھر میں کووڈ 19 کی تازہ ترین پیشرفتوں کے بارے میں وزیر صحت کی طرف سے فراہم کردہ وضاحت کو بھی سنا۔

    کونسل کے مطابق اعداد و شمار کی بنیاد پر ملک میں صحت کی صورتحال مستحکم ہوگئی ہے، اعداد و شمار سے مریضوں اور اموات کی تعداد میں کمی کا اشارہ ملتا ہے کیونکہ اس وبا کے پھیلنے کے بعد سے ریکارڈ شدہ کیسز کی مجموعی تعداد 1 لاکھ 49 ہزار 653 ہے۔

    کونسل کے مطابق 1 لاکھ 45 ہزار 579 مریض صحت یاب ہوئے جبکہ 931 مریض جاں بحق ہوئے۔

    وزیر صحت نے تصدیق کی کہ یکم جنوری کو سفری پابندی ختم کرنے کا فیصلے کیا گیا ہے۔ کونسل نے اگلے ہفتے کے روز یعنی 2 جنوری سے روزانہ کی بنیاد پر صبح 9 بجے سے شام 3 بجے تک سمندری اور زمینی سرحدوں کو کھولنے کا فیصلہ بھی کیا ہے۔

    وزیر صحت نے کونسل کو وزیر اعظم کی سرپرستی میں تجرباتی ویکسین کا استعمال کر کے ویکسی نیشن مہم کو نافذ کرنے کے لیے کی جانے والی کوششوں سے بھی آگاہ کیا۔

    اجلاس میں بتایا گیا کہ ویکسین لینے والوں پر کسی بھی قسم کے غیر متوقع منفی اثرات کا کوئی کیس سامنے نہیں آیا۔

  • غیر ملکی پروازوں کے حوالے سے سعودی حکام کی وضاحت

    غیر ملکی پروازوں کے حوالے سے سعودی حکام کی وضاحت

    ریاض: سعودی حکام نے سعودی عرب میں غیر ملکی آمد و رفت کے حوالے سے ایک بار پھر وضاحت کی ہے کہ تاحال حکومت کی جانب سے کسی لائحہ عمل کا اعلان نہیں ہوا۔

    سعودی ویب سائٹ کے مطابق سعودی عرب میں کرونا وائرس کی وجہ سے تاحال بیرون ملک سے آنے والے پروازوں پر پابندی برقرار ہے اور اس حوالے سے حکام کی جانب سے کسی قسم کا لائحہ عمل جاری نہیں کیا گیا۔

    محکمہ پاسپورٹ کے ذرائع کا کہنا ہے کہ سرکاری طور پر پروازوں کی بحالی کے حوالے سے اعلان کے بعد غیر ملکیوں کی واپسی کے بارے میں لائحہ عمل جاری کیا جائے گا۔

    محکمہ پاسپورٹ کے مطابق سعودی عرب کے لیے مختلف ممالک سے پروازوں کی بحالی کے حوالے سے تاحال کسی قسم کی حتمی اطلاع نہیں، جیسے ہی متعلقہ اداروں کی جانب سے لائحہ عمل مرتب کیا جائے گا سرکاری سطح پر اس کا اعلان کر دیا جائے گا۔

    علاوہ ازیں سعودی عرب میں رہنے والے تمام غیر ملکی جو خروج و عودہ پر اپنے ملک گئے ہوئے ہیں ان کی واپسی کے حوالے سے بھی تاحال کسی قسم کا سرکاری اعلان جاری نہیں ہوا ہے۔

    اسی طرح وہ غیر ملکی جو اپنے وطن گئے ہوئے ہیں ان کی واپسی بھی تاحال ممکن نہیں ہو رہی۔

    خیال رہے کہ کرونا وائرس کی وبا کے دوران جب مملکت میں کرفیو اور لاک ڈاؤن کا سلسلہ جاری تھا تب حکومت نے مملکت میں رہنے والے غیر ملکیوں کے اقاموں میں 3 ماہ کی مفت توسیع کی تھی۔

    دوسری بار ایوان شاہی سے ان تارکین کو رعایت دی گئی جو بیرون مملکت چھٹی یعنی خروج و عودہ پر گئے ہوئے تھے۔

    علاوہ ازیں وزٹ ویزے پر آنے والے غیر ملکی جو حالات کے سبب سفری پابندی کی وجہ سے مقررہ مدت کے دوران اپنے ملک نہیں جاسکے تھے، ان کے ویزوں کی مدت میں بھی مفت توسیع کی گئی تھی۔

  • سعودی عرب: ڈھائی ماہ کے تعطل کے بعد اندرون ملک پروازوں کا آغاز

    سعودی عرب: ڈھائی ماہ کے تعطل کے بعد اندرون ملک پروازوں کا آغاز

    ریاض: سعودی عرب میں ڈھائی ماہ کے تعطل کے بعد داخلی فضائی پروازوں کا آغاز کردیا گیا، فی الحال 11 ہوائی اڈوں سے اندرون ملک پروازوں کا آغاز کیا گیا ہے۔

    سعودی ویب سائٹ کے مطابق سعودی عرب میں 2 ماہ سے زائد جاری سفری پابندیوں کے بعد اتوار کی صبح سے داخلی پروازوں کا آغاز کردیا گیا۔ سعودی وزیر ٹرانسپورٹ نے جدہ ایئرپورٹ کے ٹرمنل ون پر مسافروں کے خیر مقدم کے لیے کیے جانے والے انتظامات کا جائزہ لیا۔

    سعودی وزیر ٹرانسپورٹ کا کہنا ہے کہ 100 کے قریب پروازیں چلائی جائیں گی اور چیزیں جلد معمول پر آجائیں گی، کرونا وائرس نے ٹرانسپورٹ کے شعبے کو تقریباً مفلوج کر دیا تھا۔ سوائے ان خصوصی پروازوں کے جو شہریوں کو دوسرے ملکوں سے واپس لانے کے لیے چلائی گئیں۔

    دوسری جانب سول ایوی ایشن کے ترجمان نے کہا ہے کہ ایئرپورٹ پر مسافروں کو الوداع کہنے یا استقبال کرنے والوں کو آنے کی اجازت نہیں ہوگی۔

    دوسری جانب ترجمان سول ایوی ایشن کا کہنا ہے کہ اتوار سے سعودی عرب کے 11 ہوائی اڈوں سے اندرون ملک پروازوں کا آغاز کردیا گیا اور اس مقصد کے لیے تمام احتیاطی تدابیر اختیار کی گئی ہیں۔

    فلائٹ سے قبل مسافروں کو خصوصی ہدایات نامے میں درج ہدایات پر عمل کرنا لازمی ہوگا تاکہ احتیاطی تدابیر پر عمل درآمد کو یقینی بنایا جا سکے۔

    ترجمان سول ایوی ایشن کا کہنا تھا کہ جہازوں میں سماجی فاصلے کے اصول کے تحت ایک سیٹ خالی چھوڑی جائے گی تاکہ کرونا سے بچاؤ کو یقینی بنایا جا سکے۔

    تمام مسافر اس امر کے بھی پابند ہوں گے کہ وہ ماسک اور دستانوں کا استعمال یقینی بنانے کے ساتھ دیگر احتیاطی تدابیر پر بھی عمل کریں جن میں ہاتھوں کو سینی ٹائز کرنا اور درجہ حرارت کا معائنہ کروانا شامل ہے۔

  • ایتھوپیا کی کوشش سے حزب اختلاف اور سوڈانی فوج کے درمیان مذاکرات کا اعلان

    ایتھوپیا کی کوشش سے حزب اختلاف اور سوڈانی فوج کے درمیان مذاکرات کا اعلان

    خرطوم : ایتھوپیا کی کوششوں سے احتجاجی تحریک کے لیڈروں کا ہڑتال ختم کر کے جرنیلوں سے مذاکرات بحال کرنے کا اعلان کردیا۔

    تفصیلات کے مطابق سوڈان میں احتجاجی تحریک کے لیڈروں نے سول نافرمانی کی مہم ختم کرنے اور حکمراں عبوری فوجی کونسل کے ساتھ مذاکرات کی بحالی سے اتفاق کیا ہے۔انھوں نے یہ فیصلہ ایتھوپیا کی ثالثی کی کوششوں کے بعد کیا ہے۔

    ایتھوپین ثالث کار محمود ضریر نے خرطوم میں صحافیوں سے گفتگو کرتے ہوئے کہا ہے کہ اتحاد برائے آزادی اور تبدیلی نے سول نافرمانی کی مہم ختم کرنے سے اتفاق کیا ہے اور دونوں فریقوں نے اقتدار ایک سول انتظامیہ کے حوالے کرنے کے لیے جلد مذاکرات کی بحالی سے بھی اتفاق کیا ہے۔

    غیر ملکی خبر رساں ادارے کا کہنا تھا کہ محمد ضریر گذشتہ ہفتے ایتھوپیا کے وزیراعظم ابی احمد کے دورے کے بعد سے خرطوم ہی میں مقیم تھے اور وہ سوڈان میں جاری بحران کے خاتمے کے لیے حزب اختلاف کے لیڈروں اور فوجی جرنیلوں سے ملاقاتیں کررہے تھے۔

    وزیر اعظم ابی احمد نے سوموار کو سوڈان کی حکمراں عبوری فوجی کونسل کے سربراہ لیفٹیننٹ جنرل عبدالفتاح البرہان سے فون پر بات چیت کی تھی اور ان سے مصالحتی کوششوں میں پیش رفت کے ضمن میں تبادلہ خیال کیا تھا۔

    احتجاجی تحریک نے الگ سے ایک بیان میں لوگوں سے اپیل کی ہے کہ وہ سول نافرمانی کی تحریک ختم کردیں اور بدھ سے اپنے کام پر آجائیں اور کاروبار شروع کردیں۔

    واضح رہے کہ سوڈان میں حکمراں فوجی کونسل کے خلاف احتجاجی تحریک کے لیڈروں کی اپیل پر منگل کو بھی عام ہڑتال تھی جبکہ خرطوم اور دوسرے شہروں میں دکانیں اور کاروباری مراکز جزوی یا مکمل طور پر بندرہے۔

    غیر ملکی میڈیا کا کہنا تھا کہ اتوار کو سول نافرمانی کے پہلے روز تشدد کے مختلف واقعات میں چار افراد ہلاک ہوگئے تھےِ۔

    سوڈانی پیشہ وران تنظیم ( ایس پی اے) نے ہفتے کے روز 3 جون کو وزارتِ دفاع کے باہر احتجاجی تحریک کے زیر اہتمام دھرنے کے شرکاء کے خلاف خونیں کریک ڈاؤن کے ردعمل میں ملک گیر سول نافرمانی کی تحریک چلانے کا اعلان کیا تھا اور عوام سے اس میں بھرپور شرکت کی اپیل کی تھی۔