اسلام آباد : پی اے ایف اکیڈمی رسالپور پاسنگ آوٴٹ پریڈ میں پاک فضائیہ کے سربراہ نے کہا ہے کہ پاکستان امن پسند ملک ہے، دہشت گردی کے خلاف جاری ملٹری آپریشنز میں کامیابیاں پاک فضائیہ کی استعداد کار کا ثبوت ہیں جبکہ سربراہ کویت فضائیہ کا کہنا ہے کہ پاکستان اور کویت کے عوام مشترکہ مذہبی اور ثقافتی اقدار کی بدولت مضبوط رشتے سے جْڑے ہیں۔
تفصیلات کے مطابق پی اے ایف اکیڈمی رسالپور میں 119 ویں کمبیٹ سپورٹ کورس کی پاسنگ آوٴٹ پریڈ کا انعقاد ہوا، کویت فضائیہ کے سربراہ میجر جنرل عبداللہ یعقوب جاسم ال فودری تقریب کے مہمان خصوصی تھے۔
اکیڈمی آمد پر ائیر کمانڈنگ آفیسر ائیر وائس مارشل عمران خالد نے مہمان خصوصی کا استقبال کیا، پاسنگ آوٴٹ پریڈ میں کْل 52 ایوی ایشن کیڈٹس پاس آوٹ ہوئے۔ پاس آوٹ ہونے والے کیڈٹس میں میڈیکل،ایجوکیشن،آئی ٹی، اکاوٴنٹس،انجینیئرنگ اورلاجسٹکس شعبہ جات سے ہے جبکہ 12 کویتی انڈر ٹریننگ آفیسرز کو بھی فلائنگ بیجز لگائے گئے۔
دونوں برادر اسلامی ممالک کی فضائی افواج میں وسیع تعاون موجود ہے، سربراہ کویت فضائیہ
سربراہ کویت فضائیہ نے پاسنگ آوٹ پریڈ سے خطاب میں کہا کہ ائیر مارشل سہیل امان کی قیادت میں پاک فضائیہ نے بہت نمایاں کارنامے انجام دیے ہیں۔ پاکستان اور کویت کے عوام مشترک مذہبی اور ثقافتی اقدار کی بدولت مضبوط رشتے سے جْڑے ہیں اور دونوں برادر اسلامی ممالک کی فضائی افواج میں وسیع تعاون موجود ہے۔
میجر جنرل عبداللہ یعقوب جاسم ال فودری کا کہنا تھا کہ پاکستان اور کویتی فضائیہ پیشہ ورانہ امور میں دو طرفہ تعاون کو مزید فروغ دے رہی ہیں۔
کامیاب ٹریننگ پر مبارکباد دیتے ہوئے مہمان خصوصی کا کہنا تھا کہ تمام کیڈیٹس اپنی بھر پور توانائیاں بروئے کار لاتے ہوئے اپنے فرائض کو نبھائیں، کیڈیٹس نے اپنے حلف کی پاسداری کو قائد اعظم محمد علی جناح کے پاک فضائیہ کے وڑن کے مطابق عمل میں لانا ہے۔
کویتی فضائیہ کے سربراہ کی شرکت ہمارے لئے باعث افتخار ہے، سربراہ پاک فضائیہ
سربراہ پاک فضائیہ ائیر مارشل سہیل امان نے تقریب سے خطاب کرتے ہوئے کہا کہ آج کی تقریب میں کویتی فضائیہ کے سربراہ کی شرکت ہمارے لئے باعث افتخار ہے، کویتی کیڈٹس کی کارکردگی سے متاثر ہوا ہوں، تربیت سے کیڈٹس کی پیشہ ورانہ صلاحیتوں میں اضافہ ہوگ پاس آوٴٹ ہونے والے تمام کیڈیٹس خصوصاً کویتی کیڈٹس کی کامیاب ٹریننگ پر مبارکباد پیش کرتا ہوں۔
سہیل امان کا کہنا تھا کہ پاک فضائیہ کسی بھی قسم کی اندرونی اور بیرونی خطرات سے نبرد آزما ہونے کی مکمل صلاحیت رکھتی ہے، دہشتگردی کی جنگ میں پاک فضائیہ نےقربانیاں دیں، پاک فضائیہ قیام امن کیلئےاہم کردار ادا کررہی ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
