چنیوٹ(31 جولائی 2025):دریائے چناب میں پانی کی سطح بلند ہونے لگی جس کے بعد سیلاب کی وارننگ جاری کردی گئی۔
تفصیلات کے مطابق مون سون بارشوں کے باعث دریائے چناب میں پانی کی سطح بلند ہونے لگی جس کے باعث سیلابی صورتحال کا خدشہ پیدا ہوگیا ہے۔
فلڈکنٹرول روم کے مطابق دریائے چناب میں پانی کا بہاؤ 26 ہزار کیوسک سے تجاوز کر گیا ہے، آئندہ 24گھنٹے میں پانی کا بہاؤ ایک لاکھ کیوسک تک پہنچنے کا خدشہ ہے۔
ضلعی انتظامیہ کا کہنا ہے کہ نچلے درجے کے سیلاب کی وارننگ جاری کردی گئی ہے اس کے علاوہ نشیبی آبادیوں کو خالی کرانے کا عمل جاری ہے، آئندہ 3دن پانی کی سطح میں مسلسل اضافہ متوقع ہے۔
محکمہ ایریگیشن کا کہنا ہے کہ دریائے چناب میں خانکی بیراج اور قادر آباد بیراج کے مقام پر نچلے درجے کا سیلاب ہے، ہیڈ مرالہ کے مقام پر دریائے چناب میں پانی کی آمد 152022 اور پانی کا اخراج 125222کیوسک ریکارڈ کی گئی ہے۔
محکمہ ایریگیشن کے مطابق دریائے چناب میں خانکی بیراج کے مقام پر پانی کی آمد 176315 اور پانی کا اخراج 170955 کیوسک ریکارڈ کی گئی ہے۔