کراچی : بینک سے رقم لے کر نکلنے والا شہری لاکھوں روپے سے محروم ہوگیا، چار مسلح افراد واردات کے بعد باآسانی فرار ہونے میں کامیاب ہوگئے۔
تفصیلات کے مطابق کراچی کے علاقے نارتھ ناظم آباد میں تھانہ شاہراہ نور جہاں کے سامنے چار ڈاکو شہری سے 30لاکھ روپے لوٹ کر فرار ہوگئے۔
ذرائع کے مطابق4مسلح ملزمان نے کار سوار کو تھانے کے سامنے روکا، رقم لوٹی اور فرار ہوگئے، اورنگزیب نامی متاثرہ شہری تھانے کے سامنے قائم بینک سے رقم لے کر نکلا تھا۔
شہری اورنگزیب کا کہنا تھا کہ ایک طرف تھانہ دوسری طرف بینک تھا، بینک کا گارڈ بھی واردات ہوتے دیکھتا رہا اور خاموش رہا، میں جیسے ہی بینک سے رقم لے کر نکلا تو 4ملزمان نے کار روکی اور لوٹ لیا۔
اس حوالے سے پولیس حکام نے بتایا کہ شہری رقم جمع کرانے بینک آیا تھا، شہری نے کہیں سے نقد رقم وصول کی اور بینک روانہ ہوا۔
پولیس کے مطابق جیسے ہی شہری بینک کے قریب پہنچا موٹرسائیکل سوار ملزمان پہنچ گئے، دیکھا جارہا ہے رقم کہاں سے وصول کی اور کس کس کو علم تھا۔
ڈکیتی کا کیس سادہ ہے کسی کو علم تھا مخبری کی گئی، ملزمان کو جلد گرفتار کرکے رقم برآمد کرلی جائے گی۔
