کراچی: زمان ٹاؤن پولیس نے مبینہ مقابلے میں ایک ڈاکو کو زخمی حالت میں گرفتار کرلیا جبکہ دوسرا ملزم فرار ہوگیا۔
تفصیلات کے مطابق کراچی کے علاقے زمان ٹاؤن پولیس نے سیکٹر 51 سی میں گھی فیکٹری پر مبینہ پولیس مقابلے کے دوران ایک ڈاکو کو زخمی حالت میں گرفتار کرلیا جسے فوری طبی امداد کے لیے جناح اسپتال منتقل کر دیا گیا۔
پولیس کا کہنا ہے کہ دوسرا ملزم فرار ہوگیا، ملزمان صبح سویرے فیکٹری ورکرز کو واردات کا نشانہ بناتے تھے اور آج بھی لوٹ مار کی غرض سے گھات لگا کر بیٹھے تھے۔
پولیس کے مطابق زخمی ملزم حیدر عرف شوٹر پولیس کو مطلوب تھا، ملزم کے خلاف دہشت گردی سمیت دیگر مقدمات درج ہیں، گرفتار ملزم سے پستول، کیش اور موبائل فون برآمد ہوا۔
پولیس کا کہنا ہے کہ ملزم اس سے پہلے بھی دوبار پولیس مقابلے میں گرفتار ہو کر بند ہوچکا ہے، گرفتار ملزم کیخلاف کورنگی زمان ٹاؤن عوامی کالونی میں مقدمات ہیں۔
