بندر سری بگاوان: برونائی کے سلطان کی آٹھویں اولاد شہزادی عظمیہ ایک پُر تعیش شادی کی ہفتہ بھر طویل تقریبات میں پیا گھر سدھار گئیں۔
غیر ملکی میڈیا رپورٹس کے مطابق دنیا کے دولت مند ترین افراد میں سے ایک برونائی کے 76 سالہ سلطان حسن البلقیہ کی بیٹی شہزادی عظیمہ نعمت البلقیہ کی شادی رواں ماہ شاہانہ روایتی انداز میں انجام پائی۔
شادی کی تقریبات کا آغاز 11 جنوری کو سلطان کی باضابطہ اجازت کے بعد ’شاہی پاوڈرنگ رسم‘ سے ہوا، جو اس کے بعد ایک ہفتے تک جاری رہیں، 38 سالہ شہزادی، جو اپنے ارب پتی باپ کی آٹھویں اولاد ہیں، کی شادی اپنے فرسٹ کزن شہزادہ بہار ابن جعفری بلقیہ سے ہوئی ہے۔
عرب نیوز کے مطابق شادی کی تقریب ایک ہفتے تک سلطان کی رہائش گاہ آستانہ نورالامان میں جاری رہی، جو دارالحکومت بندر سری بگاوان سے باہر واقع ہے۔
روایتی تقریبات میں پاؤڈرنگ کے علاوہ نکاح نامے پر دستخط کی تقریب اور شان دار استقبالیہ شامل تھی۔ نکاح کی تقریب عمر علی سیف الدین مسجد میں قرار پائی جسے برونائی کا قومی ورثہ تصور کیا جاتا ہے۔
برونائی کی شاہی ثقافت کے تحت ’پاؤڈرنگ‘ کی تقریب میں دلہن گلابی رنگ کا لباس اور سونا پہنتی ہے، جب کہ خاندان کی جانب سے جوڑے پر چاولوں کے رنگ دار پاؤڈر کا چھڑکاؤ کیا جاتا ہے اور ان کے ہاتھوں پر خوشبو دار تیل لگایا جاتا ہے۔
استقبالیہ کی تقریب میں شہزادی عظیمہ نے سفید رنگ کا گاؤن پہن رکھا تھا جب کہ ان کے شوہر پرنس بہار ابن جعفری البلقیہ نے سفید رنگ کی فوجی وردی پہن رکھی تھی۔
