بیونس آئرس: پنشن میں اضافہ روکے جانے پر ارجنٹائن میں عوام مشتعل ہو گئے ہیں، بڑی تعداد میں مظاہرین نے پارلیمنٹ کے باہر جمع ہو کر احتجاج کیا، مظاہرین پر پولیس نے کالی مرچ کا اسپرے کیا، اور ربڑ کی گولیاں برسائیں۔
روئٹرز کے مطابق پنشن میں اضافہ روکے جانے کے بعد ارجنٹائن کانگریس کے باہر جھڑپیں شروع ہو گئی ہیں، بدھ کو ملک کی کانگریس کے باہر پولیس اور مظاہرین کے مابین جھڑپ ہوئی، یہ احتجاج ایوان زیریں کے قانون سازوں کی جانب سے پنشن میں طے شدہ اضافے کو روکنے کے حق میں ووٹ دینے پر شروع ہوا ہے۔
ایوانِ نمائندگان نے پنشن میں اضافے کے حق میں 153 ووٹ ڈالے اور اس کے خلاف 87 ووٹ پڑے، تاہم بل کی منظوری کے لیے دو تہائی اکثریت درکار تھی جو مکمل نہ ہو سکی، دائیں بازو کے صدر جیویر میلی نے اس بل کی مخالفت کی اور اسے ویٹو کر دیا۔
جیسے ہی ووٹنگ کی خبر پھیلی، مرکزی بیونس آئرس میں احتجاج کرنے والے سینکڑوں افراد نے پولیس کی طرف سے کھڑی کی گئی رکاوٹیں توڑ دیں اور سڑکوں پر ہنگامہ آرائی شروع کر دی، اس دوران سیکیورٹی فورسز کے ساتھ جھڑپیں بھی ہوئیں۔
اے ایف پی کے مطابق صدر مملکت کی جانب سے بل کے ویٹو کیے جانے کی خبر پر ہزاروں شہری باہر نکل آئے، اور پارلیمنٹ کی جانب مارچ کیا، ایک گروپ نے ایوان کے سامنے کھڑی رکاوٹیں توڑ ڈالیں، جس پر پولیس نے انھیں منتشر کرنے کے لیے کالی مرچ کا اسپرے کیا اور ربڑ کی گولیاں چلائیں، پرتشدد احتجاج کے دوران 12 افراد زخمی اور 3 گرفتار ہوئے۔
واضح رہے کہ ارجنٹائن کی حکومت کئی برسوں سے مالی خسارے کی شکار ہے، جس کو ختم کرنے اور مہنگائی پر قابو پانے کے لیے اخراجات میں کٹوتیوں کے ایک سخت کفایت شعاری پیکج پر زور دیا جا رہا ہے۔
