Tag: rules and regulations

اسلام آباد: عمران خان کی توشہ خانہ کیس میں پیشی کے سلسلے میں آج وفاقی پولیس نے قواعد و ضوابط جاری کیے ہیں۔

تفصیلات کے مطابق وفاقی پولیس نے عمران خان کی پیشی کے موقع پر قواعد و ضوابط کا نوٹیفکیشن جاری کر دیا ہے، یہ نوٹیفکیشن پی ٹی آئی کو بھی بھجوا دیا گیا ہے۔

نوٹیفکیشن کے مطابق کوئی روڈ بلاک نہیں کیا جائے گا، ایمبولینس اور فائر بریگیڈ کو راستہ دیا جائے گا، پولیس کو گاڑیوں اور شخصیات کی تلاشی سے نہیں روکا جائے گا۔

سرکاری اور پرائیویٹ پراپرٹی کو نقصان پہنچا تو ذمہ داری پی ٹی آئی کی ہوگی، ریاست یا مذہب مخالف کوئی بھی پلے کارڈ یا بینر آویزاں، ساتھ لانے کی اجازت نہیں ہوگی، کسی بھی سیاسی یا مذہبی پارٹی کا جھنڈا نذر آتش نہیں کیا جائے گا، اور تمام قوانین کی پابندی کرنا ہوگی۔

پرائیویٹ سیکیورٹی انتظامات کی تفصیلات چیف سیکیورٹی آفیسر کو جمع کرانا ہوگی، عمران خان، ان کی ٹیم کو بم ڈسپوزل اسکواڈ کے ذریعے چیک کرنے کی آفر کی جائے، کسی قسم کی خلاف ورزی کی صورت میں قانونی کارروائی کا سامنا کرنا ہوگا۔

عمران خان کے وکلا نمائندے، ان کی ٹیم اور پارٹی ممبرز کی لسٹ جمع کرانا ہوگی، قواعد و ضوابط کا نوٹیفکیشن عمران خان کے چیف آف اسٹاف شبلی فراز کو بھی بھجوایا گیا۔

واضح رہے کہ اسلام آباد اور راولپنڈی میں دفعہ 144 نافذ کر دی گئی ہے، ہر قسم کے اجتماع اور ریلی پر پابندی ہوگی، پرائیویٹ سیکیورٹی اہل کاروں کے اسلحہ لے کر چلنے پر بھی پابندی ہوگی۔

سڑکوں پر کڑا پہرا دیا جا رہا ہے، اور اسلام آباد پولیس نے سیکیورٹی پلان کے تحت 5 ہزار اہل کار تعینات کر دیے ہیں۔ جوڈیشل کمپلیکس کے اطراف کنٹینر لگا کر راستے سیل کر دیے گئے ہیں، توشہ خانہ کیس کی سماعت کچہری کی بجائے جوڈیشل کمپلیکس جی 11 میں ہوگی، جوڈیشل کمپلیکس میں دیگر کیسزمنسوخ کر دیے گئے۔