کراچی: روس سے آنے والے جہاز سے خام تیل کی منتقلی کا عمل جاری ہے، 45 ہزار میٹرک ٹن کروڈ آئل میں سے 27 ہزار میٹرک ٹن جہاز سے منتقل کیا جاچکا ہے۔
تفصیلات کے مطابق کراچی پورٹ ٹرسٹ (کے پی ٹی) کے ٹریفک مینیجر جاوید میمن کا کہنا ہے کہ روسی خام تیل کے جہاز سے 45 ہزار میٹرک ٹن کروڈ آئل کی منتقلی کا عمل جاری ہے۔
جاوید میمن کا کہنا ہے کہ 45 ہزار میٹرک ٹن کروڈ آئل میں سے 27 ہزار ٹن روسی خام تیل ڈسچارج کیا جا چکا ہے جبکہ مزید 18 ہزار ٹن کروڈ آئل کی منتقلی کی جارہی ہے۔
انہوں نے کہا کہ مکمل ڈسچارجنگ کل صبح تک مکمل ہو جائے گی۔
جاوید میمن کا کہنا ہے کہ روسی خام تیل لانے والا جہاز مزید 4 روز کراچی بندرگاہ پر موجود رہے گا، کے پی ٹی پر 70 ہزار ٹن خام تیل کے جہاز آنے کی صلاحیت ہے۔
انہوں نے مزید بتایا کہ ممکنہ طوفان کے پیش نظر جہاز کو برتھ کر دیا گیا تھا۔
خیال رہے کہ تیل بردار روسی جہاز 11 جون کو کراچی پہنچا تھا، پیور پوائنٹ نامی جہاز 45 ہزار 142 میٹرک ٹن تیل لے کر پہنچا ہے۔
وزیر مملکت برائے پیٹرولیم ڈاکٹر مصدق ملک کے مطابق روس سے سستا تیل آنے کے بعد ملک میں پیٹرول کی قیمتیں کم ہونا شروع ہوجائیں گی۔
