واشنگٹن: امریکا نے اعتراف کیا ہے کہ رواں برس روسی فوج کو یوکرین سے نکالنا ’بہت مشکل‘ ہے۔
غیر ملکی میڈیا کے مطابق امریکی فوج کے سربراہ جنرل مارک ملی نے جرمن رامسٹین ایئربیس پر ایک اجلاس کے بعد کہا کہ اس سال روسی فوج کو یوکرین سے نکالنا مشکل ہے۔
جنرل مارک ملی کا کہنا تھا کہ جنگ صرف مذاکرات کی میز پر ہی ختم ہوگی، انھوں نے کہا کہ فوجی نقطہ نظر سے یہ ایک بہت مشکل لڑائی ہے۔
دوسری جانب یورپ کے بعد امریکا نے بھی یوکرین کو مزید بھاری اسلحہ دینے کا اعلان کر دیا ہے، امریکی محکمہ دفاع کے مطابق یوکرین کو مزید ڈھائی ارب ڈالر کی فوجی امداد دی جائے گی۔
یوکرین روس تنازع کا واحد حل سفارت کاری ہے: وزیر خارجہ پاکستان
امریکی امداد میں سیکڑوں بکتر بند گاڑیاں، راکٹ، بارود اور دفاعی سسٹم شامل ہوں گے۔ بائیڈن انتظامیہ نے یوکرین سے کہا ہے کہ نئے اسلحے کی فراہمی تک وہ روس پر جوابی حملے نہ کرے۔
ادھر روس نے پھر دھمکی دی ہے کہ یوکرین جنگ میں اگر اس نے شکست کھائی تو ایٹمی جنگ ہو سکتی ہے۔
روسی سیکیورٹی کونسل کے نائب چیئرمین دمتری میدودیف کا کہنا ہے کہ ایٹمی طاقتوں نے کبھی برے تنازعات نہیں ہارے، مغربی اتحادیوں کو یوکرین جنگ کے نتائج پر غور کرنا چاہیے۔
