بیجنگ/ ماسکو: چین نے ریکارڈ مقدار میں روسی گیس خرید لی ہے، دوسری طرف روسی صدر ولادیمیر پیوٹن نے چین کو گیس فراہمی کے بڑے منصوبے کا آن لائن افتتاح کیا۔
تفصیلات کے مطابق چین نے گزشتہ ماہ روسی مائع قدرتی گیس کی ریکارڈ مقدار میں درآمد کی، جب کہ روسی خام تیل اور کوئلے کی فروخت میں بھی اضافہ ہو گیا ہے، حالاں کہ یورپ میں خریداروں نے یوکرین پر حملے کی سزا کے طور پر روسی توانائی کی مصنوعات سے گریز کیا ہے۔
ادھر روس نے سائیبریا کے راست چین کو گیس کی سپلائی شروع کر دی ہے، روسی صدر ولاد یمیر پیوٹن نے گیس فراہمی کے بڑے منصوبے کا آن لائن افتتاح کیا۔
سربین گیس فیلڈ کے افتتاح سے چین کو گیس کی سپلائی میں اضافہ ہو جائے گا، اس سلسلے میں مشرقی روس میں یہ گیس کی فراہمی کا سب سے بڑا منصوبہ ہے۔
روس نے یورپ کی بجائے مشرق کو گیس برآمد کرنے کا ذریعہ بنانے کے منصوبے پر کام شروع کر دیا ہے۔
چین کی جانب سے سپر چِلڈ فیول کی کُل خریداری میں 5.4 فی صد کمی کے باوجود، نومبر میں ایل این جی کی روسی فروخت ایک سال پہلے سے دگنی ہو کر 8 لاکھ 52 ہزار ٹن ہو گئی۔
روسی توانائی کی مجموعی خریداری، بشمول تیل کی مصنوعات، نومبر میں 8 بلین ڈالر تک پہنچ گئی، جو پچھلے مہینے میں 7.8 بلین ڈالر تھی۔ یہ خریداری یوکرین میں جنگ شروع ہونے کے بعد سے اب تک مجموعی طور پر 68 بلین ڈالر ہے، جو گزشتہ سال اسی عرصے کے دوران 41 بلین ڈالر تھی۔
نومبر میں روس سے تیل کی درآمد ایک سال پہلے کے مقابلے میں 17 فی صد بڑھ کر 7.81 ملین ٹن ہو گئی، جو اگست کے بعد سب سے زیادہ ہے، روس نے چین کے سب سے بڑے سپلائر سعودی عرب کو بھی پیچھے چھوڑ دیا۔
