ماسکو: روس نے ایک ایسی فہرست جاری کی ہے جو غیر دوست ممالک پر مبنی ہے۔
تفصیلات کے مطابق روسی حکومت نے غیر ملکی ریاستوں اور خطوں کی ایک فہرست کی منظوری دی ہے، جس میں ان ممالک کو رکھا گیا ہے جو روس، اس کی کمپنیوں اور شہریوں کے خلاف غیر دوستانہ کارروائیاں کرتے ہیں۔
فہرست میں امریکا، کینیڈا، یورپی یونین کی ریاستیں، برطانیہ (بشمول جرسی، انگویلا، برٹش ورجن آئی لینڈ، جبرالٹر)، یوکرین، مونٹی نیگرو، سوئٹزرلینڈ، البانیہ، اندورا، آئس لینڈ، لیچٹنسٹائن، موناکو، ناروے شامل ہیں۔
اس فہرست میں سان مارینو، شمالی مقدونیہ، جاپان، جنوبی کوریا، آسٹریلیا، مائیکرونیشیا، نیوزی لینڈ، سنگاپور، اور تائیوان کو بھی جو کہ (چین کا علاقہ تصور کیا جاتا ہے، لیکن 1949 سے اس کی اپنی انتظامیہ کے زیر انتظام ہے) شامل کیا گیا ہے۔
روس کو دیوالیہ ہونے سے بچانے کیلیے پیوٹن کا اہم فیصلہ
فہرست میں جن ممالک اور علاقوں کا ذکر کیا گیا ہے وہ یوکرین میں روسی مسلح افواج کے خصوصی فوجی آپریشن کے آغاز کے بعد روس کے خلاف پابندیاں عائد کر رہے ہیں یا اس میں شامل ہوئے۔
واضح رہے کہ روسی صدر ولادیمیر پیوٹن نے ایک حکم نامے پر دستخط کر کے ملک کو دیوالیہ ہونے سے بچانے کے لیے بیرونی قرضے ملکی کرنسی روبل میں ادا کرنے کے احکامات جاری کیے ہیں، اس کے مطابق بیرونی قرض دہندگان کو عارضی طور پر قرضوں کی ادائیگی غیر ملکی کرنسی کے بجائے روبل سے کی جا سکے گی، اور اس اقدام کا مقصد قرضے واپس نہ کرسکنے یعنی نادہندہ ہونے سے بچنا ہے۔
