کراچی : پاکستان میں ذی الحج کا چاند نظر آگیا ہے، یکم ذی الحج کل بروز منگل 20 جون جبکہ عید الاضحیٰ جمعرات 29 جون کو منائی جائے گی۔
چیئرمین مرکزی رویت ہلال کمیٹی مولانا عبدالخبیرآزاد نے کہا ہے کہ ملک کے مختلف حصوں سے چاند نظر آنے کی شہادتیں موصول ہوگئی ہیں جس کے بعد یہ اعلان کیا جاتا ہے کہ یکم ذوالحجہ کل 20 جون بروز منگل اور عیدالاضحیٰ29جون جمعرات کو ہوگی۔
چیئرمین رویت ہلال کمیٹی نے بتایا کہ پاکستان کے بیشتر مقامات پر مطلع صاف رہا، اسلام آباد، لاہور، خانپور، بہاول نگر اور کراچی سے ذی الحج کا چاند نظرآنے کی شہادتیں موصول ہوئیں۔
اجلاس میں چاند نظر آنے کے بعد ملکی ترقی و خوشحالی کیلئے خصوصی دعائیں مانگی گئیں، اس کے علاوہ یونان میں ہونے والے کشتی سانحے میں جاں بحق ہونے والوں کیلئے بھی دعائے مغفرت کی گئی۔
اس سے قبل مرکزی رویت ہلال کمیٹی کا اجلاس عبدالخبیر آزاد کی زیرصدارت محکمہ موسمیات کراچی کے دفتر میں منعقد ہوا۔ اجلاس میں محکمہ موسمیات کے ماہرین اور سپارکو حکام کے علاوہ رویت ہلال کمیٹی کے اراکین نے شرکت کی۔
واضح رہے کہ گزشتہ روز سعودی عرب اور یو اے ای میں ذوالحجہ کا چاند نظر آگیا، دونوں ممالک میں حج کا رکن وقوف عرفہ 27 جون بروز منگل کو ہوگا جبکہ عید الاضحیٰ 28 جون بروز بدھ کو منائی جائے گی۔
