لاہور: وفاقی وزیر ریلوے خواجہ سعد رفیق نے کہا ہے کہ اب حکومت کے کاموں میں مداخلت بڑھ گئی ہے، اس کا ایک ہی حل ہے کہ الیکشن وقت پر ہوں، الیکشن شفاف اور وقت پر کرانا حکومت، اداروں کی ذمہ داری ہے۔

ان خیالات کا اظہار انہوں نے لاہور میں تقریب سے خطاب کرتے ہوئے کیا، سعد رفیق نے کہا کہ ایک دوسرے پر جھوٹے الزامات لگانے کے بجائے بھی سیاست ہوسکتی ہے، کھینچا تانی، جوڑ توڑ کا ماحول ہوتا ہے تو خطرناک صورتحال ہوتی ہے، چیزیں بڑی مشکل سے جڑی ہیں ہمیں مل کر آگے جانا ہے۔

وزیر ریلوے نے کہا کہ مقابلہ کارکردگی کی بنیاد پر کریں گالیوں، الزامات کی بنیاد پر نہیں کریں، جھوٹے الزامات اور گالیوں سے دراڑیں پڑ جاتی ہیں، پاکستان کا ووٹر ٹی وی دیکھ کر نہیں بلکہ کام کی کارکردگی پر ووٹ دیتا ہے، لوگ آنکھوں سے دیکھتے، کانوں سے سنتے اور اپنے دل سے فیصلہ کرتے ہیں۔

سعد رفیق نے کہا کہ ہماری حکومت نے لوڈ شیڈنگ کے بحران پر قابو پانے کی کامیاب کوشش کی، 10 ہزار سے زائد میگاواٹ بجلی پیدا نہ ہوتی تو صرف دو گھنٹے بجلی آتی، نیت ٹھیک ہو اور ارادے مضبوط ہوں تو ہر ادارہ ٹھیک ہوسکتا ہے۔

انہوں نے کہا کہ الیکشن کی دھاندلی سے لے کر ہمارے عقیدے اور ایمان پر حملے ہوئے، ن لیگ کی حکومت کو غیر مستحکم کرنے کی کوشش کی گئی، لڑائی کسی اور جھگڑا کسی اور کے درمیان ہورہا ہے، ہم جھگڑا نہیں چاہتے مگر اس کا نتیجہ کچھ نہیں نکلنا، ہم نے کسی کو گالی نہیں دینی اور نہ ہی ڈنڈا اٹھانا ہے۔

سعد رفیق نے کہا کہ عمران خان کو نواز شریف کو نکالنے کا نقصان ہوا ہے، ملک میں ووٹ کے فیصلے کی حرمت کو ماننا پڑے گا، کوئی اچھا کام کرے تو تعریف اور غلط کام پر محاسبہ ہونا چاہئے، آگے نکلنے کے لیے پاکستان کو سب کے تعاون کی ضرورت ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں.