پاکستان شوبز انڈسٹری کی معروف اداکارہ صبا فیصل نے لڑکیوں کو حقیقت پر مبنی مشورے دیے ہیں۔
صبا فیصل پاکستانی سلیبریٹی ہیں جو اپنی شاندار اداکاری کی مہارت اور اسکرین پر متاثر کن موجودگی کی وجہ سے پسند کی جاتی ہیں، وہ پاکستانی ڈراموں میں منفی یا چیلنجنگ کردار ادا کرنے کے لیے مشہور ہیں۔
حال ہی میں صبا فیصل نے اے آر وائی کے مارننگ شو ‘گڈ مارننگ پاکستان’ میں شرکت کی جہاں انہوں نے نوجوان دلہنوں کے لیے نہایت اہم اور حقیقت پر مبنی مشورے دیے۔
شو میں مستقبل کی دلہن نے سوال کیا کہ میں جلد ہی شادی کرنے والی ہوں لیکن مجھے لگتا ہے کہ میرے سسرال والے مجھے بہت طعنے دیتے ہیں، میں مستقبل میں اس صورتحال سے کیسے نمٹوں گی؟۔
جس کے جواب میں اداکارہ صبا فیصل نے کہا کہ فی الحال آپ کے منگیتر آپ سے خوش ہیں، لیکن میں نے بہت کم مردوں کو شادی کے بعد بدلتے دیکھا ہے، مگر اکثر بیٹے والدہ کو ہی ترجیح دیتے ہیں، بطور منگیتر اِس وقت وہ ایک رومانوی کیفیت میں ہیں، لیکن ایک وقت ایسا آتا ہے کہ مرد وہ کرتا ہے جو اسے بہتر لگتا ہے۔
صبا فیصل نے مزید وضاحت کرتے ہوئے کہا کہ ‘پاکستان جیسے معاشرے میں شادی صرف دو افراد کا بندھن نہیں ہوتی بلکہ یہ دو خاندانوں کے درمیان ایک رشتہ ہوتا ہے، اور یہی وجہ ہے کہ یہاں شادیوں کا دار و مدار اکثر خاندانوں کے درمیان ہم آہنگی پر ہوتا ہے، جب خاندانوں میں اتفاق ہوتا ہے تو شادیاں چلتی ہیں، ورنہ اختلافات لڑکی اور لڑکے دونوں کی زندگیوں کو متاثر کرتے ہیں۔
صبا فیصل نے مزید کہا کہ اگر ساس کا رویہ منفی ہے تو وہ ایک الگ مسئلہ ہے، مگر میں سمجھتی ہوں کہ آپ کو آگے جا کر مشکلات پیش آسکتی ہیں، ہو سکتا ہے آپ کا شوہر آپ کے لیے اپنا خاندان چھوڑ دے، جو آپ کو اس وقت اچھا لگے گا، لیکن یاد رکھیں کہ جو مرد آپ کے لیے اپنی ماں یا بہن کو چھوڑ سکتا ہے، وہ کل کو آپ کو بھی چھوڑ سکتا ہے۔
اداکارہ نے مزید کہا کہ لڑکے کی فیملی سے الگ ہونے کے بعد آپ کو وہ زندگی مل جائے جو آپ ہمیشہ سے چاہتی تھیں اور ہو سکتا ہے آپ کا شوہر آپ کی خواہشیں بھی پوری کرے لیکن میرا ماننا ہے کہ مرد پر بہت بڑی ذمہ داری ہوتی ہے اور جب وہ دو طرفہ کشمکش میں پھنس جاتا ہے، تو وہ اکثر ہار جاتا ہے۔
