پاکستانی شوبز انڈسٹری کے سینیئر اداکار توقیر ناصر نے اداکارہ صبا قمر کو آڈیشن میں مسترد کرنے کا انکشاف کیا ہے۔
پاکستانی شوبز انڈسٹری کے سینیئر اداکار توقیر ناصر نے حال ہی میں نجی ٹی وی چینل کے پروگرام میں بطورِ مہمان شرکت کی جہاں اُنہوں نے اپنے کیریئر کی جدوجہد سمیت مختلف امور پر بات کی۔
توقیر ناصر نے اپنی ساتھی اداکارہ صبا قمر سے متعلق بات کرتے ہوئے کہا کہ صبا قمر موجودہ دور کی بہترین پاکستانی اداکارہ ہیں لیکن ماضی میں وہ شاندار اداکارہ نہیں تھیں جس کی وجہ سے میں نے اُنہیں آڈیشن میں مسترد بھی کردیا تھا۔
توقیر ناصر نے کہا کہ میں نے اپنی پروڈکشن میں بننے والے ڈرامے کے لیے کئی اداکاروں کے آڈیشن لیے تھے جن میں صبا قمر بھی شامل تھیں لیکن میں نے انہیں اپنے کام سے مخلص نہیں پایا تھا۔
اداکار نے کہا کہ جب میں صبا قمر کو چار لائنز کے ڈائیلاگز دیے تھے جو اُنہوں نے فرفر ادا کردیے تھے، اُنہیں اس وقت ڈائیلاگز بولنے میں مہارت نہیں تھی، صبا قمر نے اتنی جلدی میں ڈائیلاگز بولے تھے کہ جیسے اُنہیں بہت جلدی ہو۔
توقیر ناصر نے کہا کہ اداکارہ صبا قمر نے بعد میں خود بھی اعتراف کرلیا تھا کہ وہ بہت جلدی میں ہیں، اُنہیں کہیں دوسری جگہ جانا ہے، اور مجھے اپنے ڈرامے کے لیے منجھے ہوئے فنکاروں کی تلاش تھی۔
پاکستانی شوبز انڈسٹری کے سینیئر اداکار توقیر ناصر نے مزید کہا کہ مجھے صبا قمر منجھی ہوئی اداکارہ نہیں لگی تھیں، وہ میرے معیار پر پورا نہیں اُتر سکیں اور آڈیشن میں مسترد ہوگئی تھیں۔
