ممبئی: بھارت کی جانب سے پاکستان دشمنی کا ایک اورمظاہرہ، سات پاکستانی گلوکاروں کو این سی پی اے میں کنسرٹ کرنے سے پولیس کے ذریعے جبراًروک دیا گیا۔
تفصیلات کے مطابق مقبول پاکستانی بینڈ ’سچل جاز انسمبل‘نے ممبئی کے نیشنل سینٹر آف پرفارمنگ آرٹس میں کنسرٹ کرنا تھا ٹکٹ بیچے جا چکے تھے عوام جمع ہوچکی تھی لیکن ممبئیی پولیس نے آخری وقت میں اجازت نامہ منسوخ کرتے ہوئے پاکستانی فنکاروں کو پرفارم کرنے سے روک دیا۔
لاہور سے تعلق رکھنے والے اس بینڈ میں تین برطانوی جب کہ سات پاکستانی فنکار شامل ہیں۔ بھارتی میڈیا ذرائع کے مطابق پولیس نے برطانوی فنکاروں کو تو پرفارمنس کی اجازت دے دی لیکن پاکستانی پرفارمرز کے بارے میں کہا کہ موجودہ پاک بھارت کشیدگی کے باعث پاکستانی فنکاروں کو اجازت نہیں دی جاسکتی۔
اسپیشل برانچ ممبئی پولیس انے اس واقعے کی تصدیق کی ہے اور ان کا کہنا تھا کہ ماضی میں جب بھی پاک بھارت کشیدگی بڑھی ہے تو ایسے مواقع پر حالات قابو سے باہر ہوئے ہیں لہذا امن و امان کی صورتحال کو قائم رکھنے اور کسی ممکنہ ناخوشگوار واقعے سے نمٹنے کے لئے یہ فیصلہ کیا گیا کہ پاکستانی فنکاروں کو پرفارم کرنے سے روک دیا جائے۔
کنسرٹ کے آرگنائزر آخری لمحے تک کوشش کرتے رہے کہ کسی طرح اجازت حاصل کرلی جائے لیکن اپنے اس مقصد میں ناکامی پر انہوں نے شو منسوخ کرنے کا اعلان کردیا۔ اس موقع پر کنسرٹ انتظامیہ نے میڈیا کے سوالوں کا جواب دینے سے اعراض کرتے ہوئے منگل کو ایک باضابطہ ای میل کے ذریعے کنسرٹ منسوخ ہونے کی وجوہات بیان کرنے کا اعلان کیا۔