Tag: saeed ajmal

لاہور: پاکستان ٹیم کے تجربہ کار اسپنر سعید اجمل بولنگ ایکشن میں بہتری کیلئے پیر کو نیشنل کرکٹ اکیڈمی میں پی سی بی کی قائم کردہ کمیٹی کو رپورٹ کرینگے۔

کرکٹر سعید اجمل کے بولنگ ایکشن میں بہتری لانے کیلئے پی سی بی کی قائم کردہ پانچ رکنی کمیٹی پیر سے نیشنل کرکٹ اکیڈمی میں کام شروع کررہی ہے۔بولنگ ریویو کمیٹی میں محمد اکرم،مشتاق احمد،علی ضیا، علیم ڈار اور ڈاکٹر سہیل سلیم شامل ہیں۔ دوسرا گیند کے موجد ثقلین مشتاق بائیس ستمبر تک بولنگ ایکشن پروگرام کو جوائن کرینگے۔ سعید اجمل سترہ ستمبر سے شروع ہونے والے ٹی ٹوئنٹی ٹورنامنٹ سے بھی دستبردار ہوگئے ہیں۔ اب انکی تمام تر توجہ بولنگ ایکشن کو آئی سی سی کے قوانین کے مطابق درست کرنے پرمرکوزہے۔

لاہور: پاکستانی آف اسپنر سعید اجمل پرغیر قانونی بولنگ ایکشن کے سبب پابندی کے بعد قومی ٹیم کی مشکلات میں اضافہ ہوگیا ہے۔ آسٹریلیا کے خلاف سیریز سے باہر ہونے کے بعد پی سی بی نے سعیداجمل کے متبادل کی تلاش شروع کردی ہے۔

دنیا کا نمبر ون بولر پاکستان کے پاس ہے ، سعید اجمل پاکستان کرکٹ ٹیم کی ریڑھ کی ہڈی سمجھے جاتے ہیں۔ وہ تن تنہا ہی ٹیم کو کئی میچز میں کامیابی دلاچکے ہیں لیکن آئی سی سی نے غیر قانونی بولنگ ایکشن کے سبب مایہ ناز آف اسپنر پرکرکٹ کے دروازے بند کردیئے ہیں۔

ورلڈ کپ سے قبل پاکستان کو آسٹریلیا اور نیوزی لینڈ کے خلاف ہوم سیریز متحدہ عرب امارات میں کھیلنی ہے۔ آئی سی سی کے فیصلے کے بعد سعید اجمل قومی ٹیم کا حصہ نہیں ہوں گے۔ ان کی عدم موجودگی کا ٹیم کو جتنا نقصان ہوگا حریف ٹیم کو اتنا ہی فائدہ ہوگا۔

ورلڈ کپ میں بھی ان کی شرکت بولنگ ایکشن درست کرنے اور آئی سی سی سے کلئیرنس کے بعد ہی ہوگی۔ تاہم بورڈ نے اجمل کے متبادل کے تلاش کی کوششیں تیز کردی ہیں۔

پی سی بی نے دو سے تین اسپنرز کو قومی کرکٹ اکیڈمی میں طلب کرلیا ہے۔ اب دیکھنا یہ ہے کہ اجمل کی عدم موجودگی میں قومی ٹیم آئندہ ماہ آسٹریلیا کی مضبوط بیٹنگ لائن کو کس حد تک قابو میں کرنے میں کامیاب رہتی ہے۔