Tag: Saeed Ghani ppp

کراچی : پیپلزپارٹی کے مرکزی رہنما اور صوبائی وزیر محنت سعید غنی نے کہا ہے کہ جماعت اسلامی کا طرز عمل غیر سیاسی ہے، وہ جہاں الیکشن ہارتی ہے وہاں حملہ آور ہوجاتی ہے، تسلی رکھیں، میئر ہمارا ہی آئے گا۔

ان خیالات کا اظہار انہوں نے کراچی میں پریس کانفرنس سے خطاب کرتے ہوئے کیا، اس موقع پر انہوں نے جماعت اسلامی کراچی کے امیر کو اپنی تنقید کا نشانہ بنایا۔

سعید غنی نے جماعت اسلامی کراچی کے امیر حافظ نعیم الرحمان کو مخاطب کرتے ہوئے کہا کہ الیکشن ہوتے ہیں تو امیدوار جیتتے بھی ہیں ہارتے بھی ہیں، کراچی میں آپ بھی سیاست کرتے ہیں ہم بھی کرتے ہیں، ہم چاہتے ہیں کہ تمام سیاسی جماعتوں کے ساتھ مل کر بیٹھیں ۔

انہوں نے کہا کہ تسلی رکھیں!! میئر ہمارا ہی آئے گا کیونکہ کراچی کے لوگ سمجھتے ہیں کہ پیپلزپارٹی کا میئر ہوگا تو وہ بہتر طریقے سے کام کرسکتا ہے۔

صوبائی وزیر کا کہنا تھا کہ ہم نے بلدیاتی الیکشن کے لیے مکمل پلان کے ساتھ کراچی میں محنت کی تھی، جن یوسیز میں ہم جیتے ہیں ان علاقوں میں ہمارے نمائندوں نے سخت محنت کی۔

سعید غنی نے جماعت اسلامی کی الیکشن مہم کو ہدف تنقید بناتے ہوئے کہا کہ جماعت اسلامی نے الخدمت کے فنڈ کو الیکشن مہم میں استعمال کیا ہے،جس شہری کو بھی انہوں نے راشن دیا ان کا شناختی کارڈ لے لیا۔

انہوں نے کہا کہ جماعت اسلامی کے اسکولوں میں بچوں کو کہا گیا جماعت اسلامی کو ووٹ دیں، یہ اپنا کیس بنارہے تھے کہ جب ہار جائیں گے تو واویلا مچائیں گے۔

پاکستان تحریک انصاف کے حوالے سے ان کا کہنا تھا کہ پولنگ کا وقت 5بجےختم ہوجاتا ہے، پولنگ اسٹیشن میں موجود لوگ ووٹ ڈالتے ہیں، پی ٹی آئی والوں نےتو5بجے ہی پریس کانفرنس کرلی تھی،

انہوں نے بتایا کہ اب تک کے نتائج کے مطابق 5 یوسیز ہم جیت چکے ہیں، ہمارے15میں سے 7 کونسلرز الیکشن جیت چکے ہیں۔