کراچی : وزیر تعلیم سندھ سعید غنی نے عزیربلوچ سے رابطے کا اعتراف کرتے ہوئے کہا ہاں میں نے عزیر بلوچ کے گھر پر کھانا بھی کھایا ہے، عزیر بلوچ سے ہر سیاسی جماعت کا رابطہ تھا، علی زیدی کے پاس شواہد ہیں تو جاکر عدالت میں سزا دلائیں۔
تفصیلات کے مطابق وزیرتعلیم سندھ سعید غنی نے پریس کانفرنس کرتے ہوئے کہا کہ ملک میں اس وقت نان ایشو کو ایشو بنادیا گیا، لوگوں کے مسائل پر توجہ ہٹانے کی کوشش کی گئی ہے، اس وقت پوری دنیا میں پی آئی اے کو مکمل بین کردیاگیا ہے پی آئی اے کو اتنا نقصان ماضی میں کبھی نہیں پہنچا ہوگا، پی آئی اے کو نقصان نااہل اور نالائق حکومت کی وجہ سے پہنچا۔
وزیرتعلیم سندھ کا کہنا تھا کہ پوری دنیا میں پیٹرول ملتا رہا پاکستان واحد ہے جہاں لوگ محروم تھے ، پیٹرول مافیا نے غریب لوگوں کی جیبوں پر اربوں کا ڈاکہ ڈالا ہے ، پیٹرول پر 25روپے کے اضافےسےلوگوں کی توجہ ہٹانےکی کوشش کی گئی۔
چینی بحران کے حوالے سے سعید غنی نے کہا کہ کل شوگرملز ایسوسی ایشن نے اسلام آبادہائیکورٹ میں اپیل دائر کی ، ایک طرف وزیراعظم کہتے ہیں ہماری حکومت مافیا کیخلاف ہے ، دوسری طرف جہانگیر ترین کو حکومت نے خود بیرون ملک بھجوادیا، پنجاب میں گندم بحران کی وجہ سندھ میں بھی اس کا اثر ہوسکتا ہے۔
ان کا کہنا تھا کہ وزرا کے بیانات سے پی آئی اے کو بہت نقصان پہنچا، وزرا اب بھی کہتےہیں ہم ٹھیک ہیں، اب یقین ہوگیاہےیہ لوگ پی آئی اےکوبھی اسٹیل مل کی طرح زمین بوس کردیں گے، پی آئی اےکوزمین بوس کرکے اپنے کسی اے ٹی ایم سے سودا کرلیں گے۔
وزیرتعلیم سندھ نے کہا کہ وفاقی، پنجاب، کے پی کابینہ ایک دوسرے کی ٹانگیں کھینچنے پر لگی ہے، کورونا پر نالائق حکومت صرف پاکستان نہیں دنیا کو بھی دھوکہ دے رہی ہے، وفاق نے ٹیسٹ کرنا کم کردیئے اور دنیا کو کہہ رہے ہیں کورونا کنٹرول ہے، ٹرمپ نے بھی کہا تھا ٹیسٹ کرنا چھوڑ دیں حالات کنٹرول میں آجائیں گے، پاکستانی ٹرمپ نے بھی امریکی ٹرمپ کی طرز پر کام کررہے ہیں۔
عزیر بلوچ سے متعلق سعید غنی کا کہنا تھا کہ عزیربلوچ کیس میں 5سال ٹرائل چلا ، چالان ہوچکا ہے ، جہاں عزیر بلوچ کے مقدمات چل رہےہیں علی زیدی گواہ بن جائیں ، علی زیدی کے پاس شواہد ہیں تو جاکر عدالت میں سزا دلائیں
انھوں نے کہ علی زیدی کہتے ہیں نامعلوم موٹرسائیکل لفالفے میں جےآئی ٹی دےگیا، وہ وفاقی وزیر بند گئے مگر عقل نہیں آئی، علی زیدی صحیح یوسی کی نشست ہار گئے یہ کونسلر کے بھی لائق نہیں۔
وزیرتعلیم سندھ نے پی ٹی آئی رہنما پرالزامات لگاتے ہوئے کہا پی ٹی آئی ایم پی اے اصرار اللہ گنڈاصاحب سمیت7افرادخودکش دھماکے میں شہید ہوئے ، اصرار اللہ گنڈاکے بھائی نے 164 کا بیان دیا تھا ، جس میں اصراراللہ گنڈا صاحب کے بھائی نے علی امین گنڈاپور کیخلاف سیاسی دہشتگردی کاالزام لگایا اور کہا علی امین گنڈاپورکے بھائی عمرامین ملوث ہیں۔
سعید غنی نے مزید کہا کہ عزیر بلوچ کا بیان ابھی بھی مشکوک ہے، اس سے جن حالات میں بیان لیاگیا وہ ہمیں نہیں معلوم ، سانحہ بلدیہ ٹاؤن جےآئی ٹی بھی آئی اس پر کیوں بات نہیں ہوتی ، اتحادی ہونے پر ان لوگوں نے سانحہ بلدیہ ٹاؤن جے آئی ٹی غائب کردی۔
ان کا کہنا تھا کہ پی ٹی آئی اپنے فارن فنڈنگ کیس سے بھاگ رہی ہے، فارن فنڈنگ میں اسرائیل ،بھارتیوں نےپیسے دیئے ، علی زیدی نےشوکت خانم فنڈ کے 3 ملین ڈالر اپنے اکاونٹ میں ڈالے۔
وزیرتعلیم سندھ نے کہا کہ میں منشیات فروش ہوں تو میرے ساتھ ٹی وی پر بیٹھو، ایک وزیر کے گھر امن کمیٹی والے ملتے رہے ،کھاتے رہے ہیں، دھرنے میں امن کمیٹی کے رہنماآتےرہے اوراسٹیج پربیٹھتے رہے ، حبیب جان ٹیلی فون پر دھرنے سے خطاب کرتے رہے ہیں، ہاں میں نے عزیر بلوچ کے گھر پر کھانا بھی کھایا ہے ، عزیر بلوچ سے ہر سیاسی جماعت کا رابطہ تھا، تمام بڑی جماعتوں عزیر بلوچ کے رابطے میں تھے۔
ذوالفقار مرزا کے حوالے سے سعید غنی کا کہنا تھا کہ ذوالفقار مرزا کے گند کو صاف کرنے کی کوشش کی ہے ، ذوالفقار مرزاعزیر بلوچ نہیں پیپلزپارٹی کیخلاف بول رہا ہے ، فہمیدہ مرزا کل ٹی وی جھوٹ بول رہی تھیں، 2008میں بی بی کی شہادت کے بعد کلین سویپ کیا تھا، شکور شاہ پیپلزپارٹی کے ایم این اے کے سامنے کھڑے ہوئے تھے اور پیپلزپارٹی نے 2008میں ہر حلقے میں جھاڑو پھیر دیا تھا۔
انھوں نے مزید کہا کہ ذوالفقارمرزا نے پیپلزپارٹی کے خلاف کیا کیا نہیں بولا ، فہمیدہ مرزا کے شوہر کووزیر داخلہ آصف زرداری نےبنایا تھا، 2013میں فہمیدہ مرزا نے پیپلزپارٹی کا ٹکٹ مانگا، میں بہت ساری چیزوں کا آئی وٹنس ہوں۔
وزیرتعلیم سندھ کا کہنا تھا کہ کراچی ،لیاری کےحالات کنٹرول کرنے کیلئے مذاکرات کیے ، ہم کیا لیاری کے عوام کو لاوارث چھوڑ دیتے ، پی ٹی آئی دہشت گردوں کا سیاسی ونگ ہے ، فہمیدہ مرزا اسلامک دنیا کی پہلی اسپیکربنی تھیں، کبھی تصور کیا تھا۔
سعید غنی نے کہا کہ فہمیدہ اور ذوالفقار مرزا آپ جو کچھ بنے آصف زرداری کی وجہ سے بنے، بدین میں جب الیکشن لڑنے گئے تھے ان کا وہاں گھر بھی نہیں تھا، آج بدین ان کی ریاست بنی ہوئی ہے ، کہاں سے لیکر آئے یہ سب ؟ سیاسی مخالفت ہوتی ہے مگر انسان کو دائرے میں رہنا چاہیے۔
