کراچی : سفاری پارک میں سٹی وارڈن آپے سے باہر ہوگیا، سٹی وارڈن نے فٹ پاتھ پر بیٹھی فیملی پربدترین تشدد کرکے انہیں ہراساں کیا۔
کراچی کے مشہور تفریحی مقام سفاری پارک میں سٹی وارڈن کی غندہ گردی کا واقعہ پیش آیا ہے جس میں سٹی وارڈن نے پارک اندر فٹ پاتھ پر بیٹھی خاتون کے سامنے اس کے ساتھ آنے والے مرد کو تشدد کا نشانہ بنایا۔
واقعے کی ویڈیو اے آر وائی نیوز نے حاصل کرلی، ویڈیومیں سٹی وارڈن کو فیملی کے پاس رکتے دیکھا جاسکتا ہے، سٹی وارڈن نے فیملی کے سامنے شہری پر تشدد کیا اور غلیظ گالیاں بھی دیں۔
اس حوالے سے ذرائع کا کہنا ہے کہ فیملی کے ساتھ موجود مرد کی سٹی وارڈن سے کسی بات پر تلخ کلامی ہوئی تھی اور گالم گلوچ کے بعد بات ہاتھا پائی تک جا پہنچی۔
تشدد کرنے میں ملوث سٹی وارڈن کی شناخت نجم ثاقب کے نام سے ہوئی ہے، بتایا جارہا ہے کہ پارک میں داخل ہوتے ہوئے شہری کی وارڈن سے تلخ کلامی ہوئی تھی جس پر بعد میں موٹر سائیکل پر اندر آیا اور مار پیٹ شروع کردی، اس موقع پر شہری نے جواب میں اس پر انگلی بھی نہیں اٹھائی۔ اس موقع پر قریب موجود لوگوں نے شہری کو بچانے کی کوشش کی۔
ویڈیو میں دیکھا جاسکتا ہے کہ سٹی وارڈن نے خاتون کے سامنے شہری پر تشدد کرتے ہوئے اس کے منہ پر بھی لات ماری۔ یہ واقعہ گزشتہ روز پیش آیا جس کی ویڈیو آج منظر عام پر آئی ہے۔
اس حوالے سے میڈیا پر خبر نشر ہونے کے بعد ڈائریکٹر زو نے سٹی وارڈن کیخلاف کارروائی کے احکامات جاری کردیئے ہیں۔
