لاہور : سابق ایڈووکیٹ جنرل پنجاب نے وزیراعظم پاکستان شہباز شریف کو فاشسٹ قرار دے دیا، احمد اویس نے چیف جسٹس سے موجودہ صورتحال پر نوٹس لینے کا مطالبہ کردیا۔
لاہور میں سابق ایڈووکیٹ جنرل پنجاب احمد اویس نے پریس کانفرنس کرتے ہوئے کہا کہ پہلی بار احساس ہوا شہباز شریف جمہوریت کی آڑ میں فاشسٹ ہیں آٸین ان کے تابع نہیں۔
جس شخص کو آئین کی پرواہ نہیں اسے عہدے پر رہنے کا حق نہیں ، آئین کو پامال کیا گیا تو کچھ نہیں بچے گا۔ کسی کی اقتدار کی ہوس کیلئے آئین کو اس کا تابع نہیں بنایا جا سکتا۔
انہوں نے کہا کہ گورنر کی تبدیلی کے معاملے پر صدر مملکت عارف علوی کی توہین کی گٸی، میرا مطالبہ ہے کہ چیف جسٹس اس معاملے کا ازخود نوٹس لیں۔
احمد اویس نے کہا کہ میں پریس کانفرنس اس لیے نہیں کر رہا کہ مجھے ڈی نوٹیفائی کردیاجائے گا، میں نے استعفے کا اصولی فیصلہ کرلیا ہے، مجھے صرف گورنر ہی عہدے سے ہٹا سکتے ہیں۔
مزید پڑھیں : پنجاب حکومت نے ایڈووکیٹ جنرل احمد اویس کوعہدے سے ہٹادیا
انہوں نے کہا کہ میرا عہدہ آٸینی ہے مجھے چیف ایگزیکٹو کی خواہش پر عہدے سے نہیں ہٹایا جاسکتا جب تک گورنر پنجاب چاہیں گے کام کرتا رہوں گا۔
ایڈووکیٹ جنرل پنجاب نے پاکستان کی عوام سے اپیل کی کہ وہ گھروں سے باہر نکل آٸیں اور اپنا آٸین اور ملک بچاٸیں، بحیثیت پاکستانی یہ آپ کا حق ہے۔
