کراچی : سابق صدر آصف علی زرداری 60 برس کے ہوگئے ، آصف علی زرداری اپنی سالگرہ اپنے بچوں کے ساتھ دبئی میں منائیں گے۔
سابق صدر کو دوستوں، پارٹی رہنماؤں، کارکنوں نے دبئی میں پھول اور تحائف بھی بھیجے ہیں، سابق صدر 26 جولائی 1956ء میں پیدا ہوئے۔
آصف علی زرداری کی والدہ کا تعلق آفندی گھرانے سے ہے، سابق صدر کے والد حاکم علی زرداری مرحوم زرداری بلوچ قبیلے کے سردار تھے۔
آصف زرداری نے ابتدائی تعلیم سینٹ پیٹرکس اور بعد میں کیڈٹ کالج کراچی میں حاصل کی، سابق صدرنے سٹیزن اسکول آف اکنامکس اینڈ بزنس سے اعلیٰ تعلیم حاصل کی۔
آصف زرداری کی 18 دسمبر 1987ء کو بے نظیر بھٹو سے شادی ہوئی ، آصف زرداری نے بے نظیر بھٹو کی شہادت کے بعد پیپلزپارٹی کی قیادت سنبھالی۔
آصف زرداری ستمبر2008 میں صدر کے عہدے پر فائز ہوئے، اس وقت آصف زرداری پیپلزپارٹی پارلیمنٹرینز کے صدر کے طور پر سیاست میں سرگرم ہیں۔
