ARYNews.tv | Urdu – Har Lamha Bakhabar

Tag: salt in tea

  • امریکی پروفیسر نے چائے سے متعلق کیا تجویز دی کہ برطانوی آگ بگولہ ہو گئے؟

    امریکی پروفیسر نے چائے سے متعلق کیا تجویز دی کہ برطانوی آگ بگولہ ہو گئے؟

    ایک امریکی کالج پروفیسر نے ذائقہ بہتر بنانے کے لیے چائے میں چٹکی بھر نمک ڈالنے کی تجویز دے کر برطانیہ میں غم و غصے کی لہر دوڑا دی۔

    غیر ملکی میڈیا رپورٹس کے مطابق ایک امریکی پروفیسر کی جانب سے چائے میں چٹکی بھر نمک شامل کرنے کی تجویز پر امریکی سفارت خانے کو اس لیے بیان جاری کرنا پڑ گیا کہ کہیں برطانیہ کے ساتھ ان کے تعلقات خراب نہ ہو جائیں۔

    امریکی پروفیسر کی تجویز نے برطانویوں کو آگ بگولہ کر دیا ہے، اور سوشل میڈیا پر ایک نئی بحث کا آغاز ہو گیا ہے۔ برائن ماور کالج کی کیمسٹری کے پروفیسر مشیل فرانکل نے چائے بنانے کی مالیکیولر سائنس پر ایک کتاب ’’دی کیمسٹری آف ٹی‘‘ لکھی ہے۔

    انھوں نے تجویز دیتے ہوئے کہا تھا کہ ایک چٹکی بھر نمک اگر چائے میں شامل کر دی جائے تو اس سے چائے کی کڑواہٹ دور ہو سکتی ہے، اور اس طرح چائے کا ذائقہ اور بہتر ہو جاتا ہے، لیکن اس تجویز نے برطانویوں کو آگ بگولہ کر دیا، اور اس پر شروع ہونے والی بحث اتنی بڑھ گئی کہ برطانیہ میں امریکی سفارت خانے کو بھی بیان جاری کرنا پڑ گیا۔

    سفارت خانے نے کہا ’’ہم برطانیہ کے لوگوں کو یہ یقین دلانا چاہتے ہیں کہ برطانیہ کے قومی مشروب چائے میں نمک شامل کرنے کا تصور امریکا کی سرکاری پالیسی نہیں ہے اور نہ کبھی ہوگی۔‘‘

    امریکی پروفیسر کی کتاب میں کافی ساری تجاویز دی گئی ہیں، جن میں سے ایک یہ بھی کہ چائے میں چٹکی بھر نمک ملانے سے اس کی کڑواہٹ کم ہو جاتی ہے کیوں کہ نمک میں موجود سوڈیم آئن ہمارے منہ میں کڑوے رسیپٹرز کو روکتے ہیں۔

    ایک امریکی ماہر نے اس مشورے کے تحت بنی چائے کا بہترین کپ کہا، لیکن جیسے ہی چائے میں نمک ملانے کا مشورہ سوشل میڈیا پر وائرل ہوا، گڈ مارننگ برطانیہ نے آن ایئر اس بات پر تبادلہ خیال کیا اور ایکس پر اپنے نشریات سے ایک کلپ شیئر کیا، اور لکھا کہ ایک امریکی ماہر کے مطابق ایک چٹکی بھر نمک شامل ہونے سے چائے کا بہترین کپ بنتا ہے، لیکن یہ تو ایک جرم کی طرح محسوس ہوتا ہے۔

    اس پروگرام کے بعد لندن میں موجود امریکی سفارت خانے نے معاملے کی نزاکت کو سجھتے ہوئے فوراً ہی اس کا جواب دیتے ہوئے لکھا کہ آج کی میڈیا رپورٹس میں ایک امریکی پروفیسر کی چائے کے بہترین کپ کی ترکیب نے برطانیہ کے ساتھ ہمارے خصوصی تعلقات کو نقصان پہنچایا ہے۔

    انھوں نے لکھا کہ چائے دوستی کی مٹھاس ہے، اور یہ ایک مقدس رشتہ ہے جو ہماری قوموں کو متحد کرتا ہے، ہم خاموش نہیں رہ سکتے کیوں کہ اس طرح کی اشتعال انگیز تجویز ہمارے خصوصی تعلقات کی بنیاد کو خطرے میں ڈال سکتی ہے۔

    سفارت خانے نے یہ بھی لکھا کہ وہ چائے کے حوالے سے برطانیہ کے ساتھ ’’بھرپور یکجہتی‘‘ کا مظاہرہ کرتا رہے گا اور امریکی سفارت خانہ مناسب طریقے سے چائے بناتا رہے گا۔