کراچی کے شہریوں نے ڈاکو کو رنگے ہاتھوں پکڑ کر اس کی دھنائی کردی اور لہولہان کرکے زخمی حالت میں پولیس کے حوالے کردیا۔
اے آر وائی نیوز کی رپورٹ کے مطابق کراچی کے علاقے سمن آباد انچولی بلاک17میں ڈاکوؤں کی لوٹ مار کا واقعہ پیش آیا ہے۔
اس حوالے سے پولیس حکام نے بتایا کہ 2ملزمان ایک شہری سے اس کی موٹر سائیکل چھیننے کی کوشش کررہے تھے کہ شہری نے مزاحمت کرکے ایک ڈاکو کو دبوچ لیا۔
آس پاس کھڑے لوگوں نے بھی موقع پر اس ڈاکو کو قابو کرلیا اور اس کی خوب دھنائی کر ڈالی، اطلاع ملنے پر مقامی پولیس موقع پر پہنچ گئی علاقہ مکینوں نے مار مار کر اس کا بھرکس نکال دیا جس کے بعد ڈاکو کو زخمی حالت میں پولیس کے حوالے کردیا۔
پولیس کے مطابق ملزم کو طبی امداد کیلیے اسپتال منتقل کردیا گیا ہے، گرفتار ہونے والے ملزم کے قبضے سے اسلحہ برآمد ہوا ہے، واقعے کا مقدمہ درج کرکے مزید تفتیش کی جارہی ہے۔
تحقیقاتی افسر کا کہنا ہے کہ زخمی ہونے والے مبینہ ڈاکو کی تاحال شناخت نہیں ہوسکی ہے، جبکہ زخمی ملزم کا ساتھی موقع سے فرار ہونے میں کامیاب ہوگیا ہے۔
واضح رہے کہ گزشتی ہفتے کراچی کے علاقے بلدیہ ٹاؤن جنگل اسکول کے قریب فائرنگ سے مبینہ ملزم ہلاک ہوگیا، ہلاک ملزم کی لاش سول اسپتال منتقل کی گئی۔
پولیس کا کہنا ہے کہ ہلاک ہونے والے ملزم کی شناخت نہیں ہو سکی ہے، پولیس ذرائع کا کہنا ہے کہ فائرنگ مبینہ طور پر پولیس اہلکار کی جانب سے کی گئی ہے۔
پولیس ذرائع کے مطابق پولیس اہلکار ڈیوٹی کے بعد گھر جا رہا تھا، 3 ملزمان نے لوٹ مار کی کوشش کی اس دوران پولیس اہلکار کی فائرنگ سے ایک ڈاکو ہلاک جبکہ 2 فرار ہو گئے۔
