کراچی : مسلم لیگ ن کے مرکزی نائب صدر سردار مہتاب عباسی نے کہا ہے کہ خیبرپختونخوا میں بھی ن لیگ ختم ہوتی جارہی ہے۔
یہ بات انہوں نے اے آر وائی نیوز کے پروگرام الیونتھ آور میں میزبان وسیم بادامی سے خصوصی گفتگو کرتے ہوئے کہی، انہوں نے کہا کہ عمران خان کی حکومت گرانا غلط فیصلہ تھا۔
عمران حکومت گرانا درست فیصلہ نہیں تھا
مہتاب عباسی نے کہا کہ عمران حکومت گرانے سے پہلے مشورہ کرلیا جاتا تو ہم نہ گرانے کا مشورہ دیتے، عمران خان کی حکومت ساکھ کھوچکی تھی، ان کی حکومت نہیں گرانا چاہیے تھی، ہم خود اقتدار میں آگئے اور آج سارا بوجھ ہمارے گلے پڑرہا ہے۔
انہوں نے کہا کہ وقت نے ثابت کردیا ہے کہ عمران حکومت گرانا درست فیصلہ نہیں تھا، موجودہ حالات میں الیکشن ہوئے تو کوئی بہتری کا راستہ نظر نہیں آرہا، ن لیگ کو اس وقت نوازشریف کی ضرورت ہے کہ وہ یہاں واپس آئیں۔
کے پی میں ان لیگ کی قیادت کو ہٹایا جائے
سردارمہتاب عباسی نے پاکستان ڈیموکریٹک موومنٹ (پی ڈی ایم) کے ساتھ مل کر وفاقی حکومت بنانا غلطی قرار دیا تاہم پارٹی چھوڑنے کی بھی تردید کی۔ انہوں نے کہا کہ خیبرپختونخوا میں ن لیگ کے خلاف سازش ہوئی، صوبائی قیادت کو ہٹایا جائے، ورنہ پارٹی تباہ ہوجائے گی
سردار مہتاب عباسی نے کہا کہ ن لیگ چند لوگوں تک محدود کردی گئی، مریم نواز کے دورے سے متعلق ہمیں کسی نے پوچھا تک نہیں ن لیگ اب وہ پارٹی نہیں، پہلے پارٹی فیصلے کرتی تھی اب چند لوگ کرتے ہیں۔
مریم نوازجماعت کے قائد کی بیٹی ہے
ان کا کہنا تھا کہ پارٹی مرکزی قیادت کے ساتھ بیٹھ کر فیصلے کیے جاتے تو اچھا ہوتا، مریم نوازجماعت کے قائد کی بیٹی ہے، عہدہ دینا الگ بات ہے، جماعت کو ساتھ لے کر فیصلے کریں گے تو پارٹی کیلئے بھی اچھا ہوگا۔
ایک سوال کے جواب میں انہوں نے کہا کہ پارٹی قیادت جلسے کرنے جارہی ہوتی ہےتو صوبائی قیادت کو بلاتی ہے، موجودہ صوبائی قیادت خیبرپختونخوا میں پارٹی کو ختم کرنے جارہی ہے، جس پارٹی میں شخصیات کی بنیاد پرمعاملات چلائیں گے وہ ملک کیسے چلائے گی؟
ن لیگ میں بھی نمائشی عہدے ہیں
ن لیگ کے مرکزی رہنما کا کہنا تھا کہ بدقسمتی سے سیاسی جماعتوں میں کوئی جمہوری طریقہ کار ہے ہی نہیں، ن لیگ میں بھی نمائشی عہدے ہیں بات صرف اہم شخصیات کی چلتی ہے، نوازشریف ملک واپس آکر جماعت کو آگے لے کر چلتے تو اچھا ہوتا۔
سردار مہتاب عباسی نے کہا کہ نوازشریف کے ہٹنے سے ن لیگ کو بہت نقصان ہوا، موجودہ حکومت میں شامل ہونے سے ن لیگ کو بہت زیادہ نقصان ہوا، ملک کو ڈبونے میں سب پارٹیوں کا کردار ہے۔
مہنگائی سے ہر آدمی چیخ پڑا ہے
ان کا مزید کہنا تھا کہ موجودہ پالیسیوں کے باعث ہونے والی مہنگائی سے غریب تو دور سفید پوش آدمی تک چیخ پڑا ہے، غریب عوام آج اپنے مستقبل کیلئے پریشان ہے، عوام کیا ووٹ دینگے، ہماری عوام تو کھمبوں کو بھی ووٹ دیتی رہی ہے۔
