Tag: sardar usman buzdar

پنجاب کے وزیراعلیٰ اس وقت عثمان بزدار ہیں، ایڈووکیٹ جنرل

ایڈووکیٹ جنرل پنجاب احمد اویس نے سیکرٹری قانون کی جانب سے کام روکنے کے متعلق مراسلے کا جواب دے دیا، کہتے ہیں سیکرٹری نے قانون کے بارے میں لاعلمی کا مظاہرہ کیا۔

ایڈووکیٹ جنرل پنجاب احمد اویس نے جواب میں نشاندہی کی کہ22 اپریل کو بھیجا گیا مراسلہ وزیراعلیٰ کی منظوری کے بغیر جاری کیا گیا۔

یہ مراسلہ وزیراعلیٰ پنجاب کے جاری کردہ مراسلے کی تضحیک ہے، احمد اویس نے واضح کیا کہ صوبے کے وزیراعلیٰ اس وقت عثمان بزدار ہیں جب تک ان کی جگہ پر دوسرا وزیراعلیٰ نہیں آجاتا۔

اس لیے یہ تاثر بے بنیاد ہے کہ صوبائی حکومت بحال نہیں ہے، ایڈووکیٹ جنرل پنجاب نے کہا کہ قانون کی خلاف ورزی پر اُن کیخلاف تادیبی کارروائی کی جائے گی۔

علاوہ ازیں لاہور ہائیکورٹ نے سیکرٹری پنجاب اسمبلی محمد خان بھٹی کی جانب سے درخواست ضمانت واپس لینے کی بنیاد پر مسترد کردی، سرکار وکیل نے بتایا کہ سیکرٹری اسمبلی کیخلاف ایک مقدمہ اور نظر بندی کے احکامات ہیں۔

لاہور ہائیکورٹ کے جسٹس علی ضیاء باجوہ نے سیکرٹری پنجاب اسمبلی محمد خان بھٹی کی درخواست پر سماعت کی تو پنجاب حکومت کے وکیل نے بتایا کہ درخواست گزار سیکرٹری پنجاب اسمبلی کی تین دن کیلئے نظر بندی کے احکامات جاری ہوئے تھے۔

محمد خان بھٹی کیخلاف اسمبلی ہنگامہ آرائی کے الزام میں 16 اپریل کو ایک مقدمہ بھی درج ہوا ہے، سیکرٹری پنجاب اسمبلی کے وکیل عامر سعید راں نے سرکاری وکیل کے بیان کے بعد درخواست واپس لینے کی استدعا کی

جسے عدالت نے منظور کر لیا۔ یاد رہے کہ محمد خان بھٹی نے گرفتاری کے خدشے پر لاہور ہائیکورٹ سے رجوع کیا تھا۔

اپریل 29, 2022
صدر عارف علوی سے وزیر اعلیٰ پنجاب عثمان بزدار کی ملاقات

لاہور: صدر مملکت ڈاکٹر عارف علوی سے وزیر اعلیٰ پنجاب عثمان بزدار کی ملاقات ہوئی جس میں صوبے کے مختلف امور پر تبادلہ خیال ہوا۔

تفصیلات کے مطابق صدر مملکت ڈاکٹر عارف علوی سے وزیر اعلیٰ پنجاب عثمان بزدار کی ملاقات ہوئی۔ ملاقات میں وزیر اعظم کے معاون خصوصی نعیم الحق بھی موجود تھے۔

وزیر اعلیٰ پنجاب نے صدر مملکت کو سانحہ چونیاں کے ملزم کی گرفتاری اور سانحہ چونیاں جیسے واقعات کے تدارک کی حکومتی کوششوں سے آگاہ کیا۔

وزیرِ اعلیٰ پنجاب نے انسداد ڈینگی اقدامات سے متعلق اقدامات پر بھی بریفنگ دی جبکہ سڑکوں کے پروگرام ’نیا پاکستان منزلیں آسان‘ کے خدوخال سے آگاہ کیا۔

اس موقع پر صوبائی وزیر برائے صحت یاسمین راشد اور معاون خصوصی برائے صحت ڈاکٹرظفر مرزا بھی موجود تھے۔ وزیر صحت یاسمین راشد نے پنجاب میں صحت کے منصوبوں سے آگاہ کیا۔

یاسمین راشد کا کہنا تھا کہ وزیر اعظم کے وژن کے مطابق شعبہ صحت میں آسانیاں پیدا کر رہے ہیں۔ انہوں نے ڈینگی پر قابو پانے کے لیے حکومتی اقدامات سے بھی آگاہ کیا۔

اکتوبر 3, 2019
سکھ بھائی جتنا آج پاکستان کے قریب آئے ماضی میں مثال نہیں ملتی، سردار عثمان بزدار

لاہور : وزیر اعلیٰ پنجاب سردار عثمان بزدار نے کہا ہے کہ پاکستان میں سکھوں سمیت تمام اقلیتوں کو مکمل مذہبی آزادی ہے، سکھ بھائی جتنا آج پاکستان کے قریب آئے ماضی میں مثال نہیں ملتی۔

ان خیالات کا اظہار انہوں نے لاہور گورنر ہاؤس میں بین الاقوامی سکھ کنونشن سے خطاب کرتے ہوئے کیا، عثمان بزدار نے کہا ہے کہ حکومت نے ننکانہ صاحب میں بابا گرو نانک یونیورسٹی کاسنگ بنیاد رکھ دیا ہے۔

ننکانہ صاحب کی سڑکوں کی تعمیر کیلئے 15کروڑ روپے فراہم کیے گئے ہیں، سڑکوں کی تعمیر سے سکھ یاتریوں کو بہترین سہولتیں میسر ہوں گی۔

عثمان بزدار کا مزید کہنا تھا کہ سکھ بھائی جتنا آج پاکستان کے قریب آئے ماضی میں مثال نہیں ملتی، مسئلہ کشمیر پر دنیا بھر کے سکھ پاکستان کی حمایت کررہے ہیں، پاکستان امن پسند ملک ہے، پوری دنیا کو امن کا پیغام دیتے ہیں، پاکستان میں سکھوں سمیت تمام اقلیتوں کو مکمل مذہبی آزادی ہے۔

مقبوضہ کشمیر کی موجودہ صورتحال سے متعلق ان کا مزید کہنا تھا کہ پاکستان اور کشمیر کبھی جدا نہیں ہوسکتے، مودی سرکار کو سمجھ لینا چاہیے کہ مسلمانوں کی نسل کشی کے ایجنڈے کے تباہ کن نتائج سامنے آئیں گے۔

وزیر اعظم عمران خان کی اپیل پر پاکستان کے ہر شہر میں مقبوضہ کشمیر میں بھارتی ظلم و ستم کیخلاف پرزور انداز میں آواز بلند کی گئی۔

انہوں نے کہا کہ پرعزم پاکستانی قوم نے نہتے کشمیری عوام کے ساتھ مکمل یکجہتی کا اظہار کرکے واضح پیغام دیاہے، میں یوم یکجہتی کشمیر پر عوامی اجتماعات میں پنجاب کے عوام کی بھرپور شرکت پر ان کا تہہ دل سے شکریہ ادا کرتا ہوں۔

اگست 31, 2019
پنجاب کے سرکاری ملازمین کو صحت انصاف کارڈ جاری کئے جائیں گے، عثمان بزدار

لاہور : وزیراعلیٰ پنجاب سردار عثمان بزدارنے کہا ہے کہ پنجاب بھر کے سرکاری ملازمین کو صحت انصاف کارڈ جاری کئے جائیں گے۔

یہ بات انہوں نے لاہور میں میڈیا سے گفتگو کرتے ہوئے کہی، وزیراعلیٰ عثمان بزدار نے محکمہ صحت کو ہدایت کی کہ سرکاری ملازمین کو صحت انصاف کارڈ فراہم کرنے کے لئے ضروری اقدامات کئے جائیں اور متعلقہ امور جلد طے کر کے حتمی شکل دی جائے۔

انہوں نے کہا کہ صحت انصاف کارڈ کی فراہمی سے سرکاری ملازمین کو علاج معالجہ کی سہولت ملے گی۔سرکاری ملازمین ہسپتالوں میں تقریباً سوا 7لاکھ روپے تک علاج کی سہولت حاصل کرسکیں گے اور اس حد کو ضرورت پڑنے پر بڑھایا بھی جا سکے گا۔

وزیر اعلیٰ کا کہنا تھا کہ موجودہ حکومت کو زندگی کے ہر طبقے کا احساس ہے۔سرکاری ملازمین کا احساس کرتے ہوئے انہیں صحت انصاف کارڈ جاری کرنے کا فیصلہ کیاگیاہے اوریہ وہ کام ہیں جو 70سال میں اس سے قبل کسی حکومت نے نہیں کئے ۔

اگست 24, 2019
پنجاب میں نئے اضلاع اور تحصیلیں بنائی جائیں گی، سردار عثمان بزدار

لاہور : وزیراعلیٰ پنجاب سردار عثمان بزدار نے کہا ہے کہ صوبے میں نئے اضلاع اور تحصیلیں بنانے کیلئے کمیٹی قائم کر دی ہے، عوام کو پانی اور بجلی سمیت تمام سہولیات فراہم کی جائیں گی۔

ان خیالات کا اظہار انہوں نے سرکٹ ہاﺅس میں ملاقات کیلئے آنے والے فیصل آباد ڈویژن سے تعلق رکھنے والے اراکین قومی و صوبائی اسمبلی سے گفتگو کرتے ہوئے کیا۔ اس موقع پر گورنر پنجاب چوہدری محمد سروربھی موجود تھے۔

وزیراعلیٰ عثمان بزدار اراکین اسمبلی کی تجاویز، سفارشا ت اور مسائل خود نوٹ کرتے رہے۔وزیراعلیٰ نے اراکین قومی و صوبائی اسمبلی کو ان کے مسائل کے جلد حل اور ترقیاتی منصوبوں کیلئے فنڈز ترجیحی بنیادوں پر فراہم کرنے کی یقین دہانی کرائی۔

چار گھنٹے طویل ملاقات میں ان کا کہنا تھا کہ ماضی کے حکمرانوں نے ذاتی نمائش کے منصوبوں پر اربوں روپے کے وسائل برباد کئے۔ عوام سابق ادوار کے حکمرانوں کو یکسر فراموش کر چکی ہے۔نیا پاکستان بن رہا ہے اور بن کر رہے گا۔

ان کا مزید کہنا تھا کہ فیصل آباد ڈویژن میں500 ترقیاتی منصوبوں پر152 ارب روپے خرچ کئے جائیں گے۔ فیصل آباد ڈویژن کیلئے مثالی ترقیاتی پیکیج دیا ہے۔ فیصل آباد میں واسا کو فعال بنایا جائے گا۔

انفراسٹرکچر ٹیکس کا جائزہ لے کر فیصلہ کریں گے۔ انہوں نے کہا کہ صوبے میں نئے اضلاع اور تحصیلیں بنانے کیلئے کمیٹی قائم کر دی گئی ہے۔ کمیٹی کی سفارشات کی روشنی میں نئے اضلاع اور تحصیلیں بنائیں گے۔

جولائی 25, 2019
عثمان بزدار بااختیار وزیراعلیٰ ہیں، پنجاب اور اس کے وسائل محفوظ ہاتھوں میں ہیں، شہبازگل

لاہور : وزیر اعلیٰ پنجاب کے ترجمان ڈاکٹر شہبازگل نے کہا ہے کہ عثمان بزدار بااختیار وزیراعلیٰ ہیں، حسن مرتضیٰ کا بیان جھوٹ کے سوا کچھ نہیں، صوبہ محفوظ ہاتھوں میں ہے۔

یہ بات انہوں نے پنجاب اسمبلی میں پیپلز پارٹی کے ایم پی اے حسن مرتضیٰ کے بیان پر ردعمل دیتے ہوئے کہی۔ ترجمان وزیراعلیٰ پنجاب کا کہنا تھا کہ عثمان بزدار اپنی ذمہ داریاں احسن طریقے سےادا کررہے ہیں۔

وزیر اعظم عمران خان کو وزیراعلیٰ پنجاب پر پورا اعتماد ہے، حسن مرتضیٰ کا بیان جھوٹ کے سوا کچھ نہیں، عثمان بزدار پنجاب کے بااختیار وزیراعلیٰ ہیں۔

ڈاکٹر شہبازگل نے کہا کہ وسائل پنجاب کے پاس ہی ہیں اور وہ صوبے کی امانت ہیں، وسائل پر وفاق کے قبضے کی بات حقائق مسخ کرنے کی کوشش ہے۔

انہوں نے مزید کہا کہ حسن مرتضیٰ پہلے اپنے لیڈرز کی لوٹ مار کا حساب دیں، صوبہ سندھ کے عوام کو بدحال کرنے میں ان کی قیادت کا پورا حصہ ہے.

مسٹر ٹین پرسنٹ کا کچا چٹھہ ملک کے22کروڑ عوام پہلے سے جانتے ہیں، حسن مرتضیٰ کو بتانا چاہتا ہوں کہ پنجاب محفوظ ہاتھوں میں ہے۔

اپریل 7, 2019
وضو کے پانی کو قابل استعمال بنانے کیلئے وزیراعلیٰ عثمان بزدار کا اہم فیصلہ

لاہور : پنجاب حکومت نے وضو کے پانی کو دوبارہ استعمال میں لانے کیلئے داتا دربار میں پراجیکٹ شروع کرنے کا فیصلہ کیا ہے، اس کے علاوہ زکوٰة مستحقین کی نشاندہی کیلئےڈیٹا تیار کیا جائے گا۔

تفصیلات کے مطابق وزیراعلیٰ پنجاب عثمان بزدار کی زیر صدارت تین گھنٹے طویل اجلاس ہوا، ایس ایم یو کے زیراہتمام اجلاس میں سماجی بہبود کے شعبوں کی سہ ماہی کارکردگی کا جائزہ لیا گیا۔

اجلاس میں متعلقہ وزراء اور سیکریٹریز نے تفصیلی بریفنگ دی، وزیر اعلیٰ نے سماجی بہبود، بیت المال اور چائلڈ پروٹیکشن بیورو کی کارکردگی سے متعلق استفسار کیا، اجلاس میں زکوٰة گزارہ الاؤنس کی فوری تقسیم یقینی بنانے کیلئے ڈی سی کو اختیار دینے کا فیصلہ کیا گیا۔

اس موقع پر شرکاء سے خطاب کرتے ہوئے وزیراعلیٰ پنجاب عثمان بزدار نے کہا کہ زکوٰة کی تقسیم کے طریقہ کار کو فول پروف بنانے کیلئے ضروری اقدامات کئے جائیں اور زکوٰة مستحقین کی نشاندہی کیلئے قابل اعتماد ڈیٹا تیار کیا جائے۔

اس کے علاوہ اجلاس میں فیصلہ کیا گیا کہ وضو کے پانی کو دوبارہ استعمال میں لانے کیلئے داتا دربار میں پائلٹ پراجیکٹ شروع کیا جائے گا اور30مزاروں میں عطیات کی وصولی کیلئے کیش مشینیں نصب کی جائیں گی۔

فروری 19, 2019
مریضوں کو مفت ادویات کی فراہمی ہرصورت یقینی بنائی جائے، سردارعثمان بزدار

ملتان : وزیراعلیٰ پنجاب سردارعثمان بزدار نے کہا ہے کہ مریضوں کو مفت ادویات کی فراہمی ہرصورت یقینی بنائی جائے، جلد ملتان کےعوام کونشتر ٹو کا تحفہ دیں گے۔

ان خیالات کا اظہار انہوں نے ملتان کے نشتر ہسپتال کے دورے کے موقع پر انتظامیہ سے گفتگو کرتے ہوئے کیا، سردارعثمان بزدار نے نشتر اسپتال ملتان کا اچانک دورہ کیا، وزیراعلیٰ پنجاب نے مختلف وارڈز میں مریضوں کو فراہم طبی سہولتوں کا جائزہ لیا۔

انہوں نے ڈائلیسز، آئی سی یو اور میڈیکل وارڈز میں مریضوں کی عیادت کی اور مریضوں سے علاج ومعالجے کی سہولتوں سے متعلق دریافت کیا، اس موقع پر وزیراعلیٰ پنجاب نے زیر علاج ٹیچر کی عیادت کی اورپھول پیش کئے۔

بعد ازاں انہوں نے ہسپتال انتظامیہ کو ہدایات دیتے ہوئے کہا کہ صفائی کے انتظامات کو بہتر بنایا جائے، عثمان بزدار نے سختی سے ہدایت کی کہ مفت ادویات کی عدم دستیابی سے متعلق شکایت سامنے نہیں آنی چاہیے، مریضوں کو مفت ادویات کی فراہمی ہرصورت یقینی بنائی جائے۔

مزید پڑھیں: پولیس کلچر آہستہ آہستہ تبدیل ہوگا: وزیر اعلیٰ‌ پنجاب عثمان بزدار

صحافیوں سے گفتگو کرتے ہوئے وزیراعلیٰ پنجاب کا مزید کہنا تھا کہ جلد ملتان کے عوام کو نشتر ٹو کا تحفہ دیں گے، عوام کو جدید طبی سہولیات کی فراہمی اور صحت کا شعبہ اپ گریڈ کرنا حکومت پنجاب کا اولین مقصد ہے، اس سلسلے میں ادویات کی فراہمی اور کوالٹی کیلئے خصوصی نظام وضع کیا جارہا ہے۔

جنوری 17, 2019
نیا پاکستان امیر اور غریب کا فرق مٹا دے گا، وزیر اعلیٰ پنجاب عثمان بزدار

لاہور : وزیر اعلیٰ پنجاب سردار عثمان بزدار نے کہا ہے کہ چند عاقبت نااندیش عناصر تبدیلی سے خوفزدہ ہیں، نیا پاکستان امیر اور غریب کا فرق مٹا دے گا، وزیراعظم عمران خان اس پاکستان کی بنیاد رکھ رہے ہیں جس کا خواب بانیان پاکستان نے دیکھا تھا۔

تفصیلات کے مطابق وزیر اعلٰی پنجاب عثمان بزدار نے تحریک انصاف کے نو منتخب سینیٹر ڈاکٹر شہزاد وسیم سے ملاقات میں کامیابی پر مبارکباد دی اور نیک خواہشات کا اظہار کیا۔

اس موقع پر وزیر اعلٰی نے کہا کہ آپ کی کامیابی عمران خان کے نئے پاکستان کی جیت ہے، نئے پاکستان کی تعمیر میں ہم سب نے ٹیم ورک کے طور پر آگے بڑھنا ہے۔

سردار عثمان بزدار کا کہنا تھا کہ نیا پاکستان امیر اور غریب کا فرق مٹا دے گا، وزیراعظم عمران خان اس پاکستان کی بنیاد رکھ رہے ہیں جس کا خواب بانیان پاکستان نے دیکھا تھا۔

انھوں نے مزید کہا کہ چند عاقبت نا اندیش عناصر تبدیلی سے خوفزدہ ہیں، فرسودہ اور بوسیدہ نظام سے عوام کو کچھ نہیں ملا، اب عوام کی خاطر سب کچھ بدلنا ہے۔

مزید پڑھیں : پی ٹی آئی کے شہزاد وسیم پنجاب سے سینیٹ کی نشست پر کامیاب

یاد رہے گذشتہ روز گورنر پنجاب چوہدری سرور کے استعفیٰ سے پنجاب میں خالی ہونے والی سینیٹ کی نشست پرانتخاب ہوا، پی ٹی آئی کے شہزاد وسیم نےایک سو اکاسی ووٹ حاصل کرکے کامیابی حاصل کی جبکہ مسلم لیگ ن کے خواجہ حسان کو ایک سو انہتر ووٹ ملے۔

یہ نشست پی ٹی آئی کے رہنما چوہدری سرور کے استعفے کےبعد خالی ہوئی تھی، چوہدری سروراس وقت پنجاب کے گورنرہیں۔

اکتوبر 4, 2018
پنجاب حکومت کے بہترین اقدامات سے یوم عاشور پرامن رہے گا، عثمان بزدار

لاہور : وزیر اعلیٰ پنجاب عثمان بزدار نے کہا ہے کہ پنجاب حکومت کے اقدامات سے انشاءاللہ یوم عاشور پرامن رہے گا، دشمن کے ناپاک عزائم ناکام بنانے کیلئے پوری فورس چوکس ہے۔

ان خیالات کا اظہار انہوں نے سول سیکرٹیریٹ میں محرم کے مرکزی کنٹرول روم کے دورہ کے موقع پر گفتگو کرتے ہوئے کہی، انہوں نے کہا کہامن و امان برقرار رکھنے کیلئے پنجاب حکومت نے بہترین انتظامات کئے ہیں۔

پولیس اور انتظامیہ وضع کردہ سیکورٹی پلان پر عملدرآمد یقینی بنائیں، دشمن کے ناپاک عزائم ناکام بنانے کیلئے پوری فورس چوکس ہے۔

عثمان بزدار کا مزید کہنا تھا کہ جلوسوں، مجالس کی نگرانی کیلئے جدید نظام وضع کیا گیا ہے، جلوسوں کی ہیلی کاپٹروں کی مدد سے فضائی نگرانی بھی کی جارہی ہے، پنجاب حکومت کے اقدامات سے انشاءاللہ یوم عاشور پرامن رہے گا۔

واضح رہے کہ لاہور کا مرکزی جلوس نثارحویلی سے نکالا گیا جو مقرر کردہ راستوں پر گامزن ہے، عزاداران حسین نے جلوس کے راستے میں سینہ کوبی کی اور زنجرر زنی کی۔

ضلعی انتظامیہ کی جانب سے سکیورٹی کے سخت انتظامات کئے گئے ہیں، جلوس کے تمام راستوں کو مکمل طور پر سیل کرتے ہوئے ہر داخل ہونے والے ہر شخص کی میٹیل ڈیٹیکٹو کے ذریعے جامہ تلاشی لی جا رہی ہے۔

ستمبر 21, 2018

Tag: sardar usman buzdar

مزید پڑھیں : پی ٹی آئی کے شہزاد وسیم پنجاب سے سینیٹ کی نشست پر کامیاب