ARYNews.tv | Urdu – Har Lamha Bakhabar

Tag: Sarfaraz ahmad

  • سرفراز کو میچ فکسنگ کی پیش کش کرنے والے بکی کو 10 سال کی سزا

    سرفراز کو میچ فکسنگ کی پیش کش کرنے والے بکی کو 10 سال کی سزا

    دبئی: انٹرنیشنل کرکٹ کونسل کے انسداد بدعنوانی یونٹ نے قومی ٹیم کے کپتان سرفراز احمد کو میچ فکسنگ کی پیش کش کرنے والے طاقتور بکی عرفان انصاری پر 10 سال کی پابندی عائد کردی۔

    تفصیلات کے مطابق دو برس قبل (2017) میں سری لنکا کے خلاف کھیلی جانے والی پانچ ون ڈے میچز کی سیریز کے دوران عرفان نامی بکی نے تیسرے میچ سے قبل سرفراز حمد سے رابطے کی کوشش کی۔

    سرفراز احمد نے فوری طور پر پاکستان کرکٹ بورڈ کے حکام کو تمام تفصیلات فراہم کیں جس کے بعد پی سی بی نے باقاعدہ آئی سی سی میں معاملہ پہنچایا۔

    انٹرنیشنل کرکٹ کونسل کے اینٹی کرپشن یونٹ نے تحقیقات کا آغاز کیا تو بکی کی شناخت عرفان انصاری کے نام سے ہوئی جو متحدہ عرب امارات کی اہم شخصیت اور  3 دہائیوں سے شارجہ کرکٹ کونسل کے ساتھ کام کر رہے تھے۔

    مزید پڑھیں: میچ فکسنگ میں‌ ملوث بکیز کی کثیر تعداد کا تعلق بھارت سے ہے، آئی سی سی کا انکشاف

    آئی سی سی نے گزشتہ برس معاملے کی تحقیقات کا آغاز کیا اور عرفان انصاری کو ہدایت کی کہ وہ اینٹی کرپشن یونٹ کے ساتھ تعاون کریں جس پر انہوں نے صاف انکار کردیا، انٹرنیشنل کرکٹ کونسل نے ضابطہ اخلاق کی خلاف ورزی کرنے پر بکی کے خلاف چارج شیٹ جاری کی تھی۔

    اینٹی کرپشن یونٹ میں ہونے والی سماعت کے دوران پینل کو میچ فکسنگ کی پیش کش کے حوالے سے شواہد پینل کے سامنے پیش کیے گئے۔

    آئی سی سی کے اینٹی کرپشن یونٹ نے تین شقوں کی خلاف ورزی کرنے پر عادل انصاری کے خلاف فیصلہ سناتے ہوئے ان پر دس سال کی مکمل پابندی عائد کردی۔

    انٹرنیشنل کرکٹ کونسل نے اعلامیے میں سرفراز احمد کا شکریہ ادا کرتے ہوئے کہا کہ ’ایماندار کھلاڑی کی وجہ سے اینٹی کرپشن یونٹ نے بکی کی نشاندہی کی اور وہ قانون کی گرفت میں آیا‘۔

    آئی سی سی اینٹی کرپشن یونٹ کے جنرل مینیجر ایلکس مارشل کا کہنا تھا کہ ’میں سرفراز کا شکریہ ادا کرنا چاہتا ہوں کہ انہوں نے پیشہ وارانہ طریقے اپناتے ہوئے معاملے کو فوری رپورٹ کیا اور پھر ہمارے ساتے مکمل تعاون بھی کیا‘۔

    یہ بھی پڑھیں: سرفراز احمد کو میچ فکسنگ پر اکسانے والے شارجہ اسٹیڈیم کے سابق ملازم کو چارج شیٹ جاری

    اُن کا کہنا تھا کہ ’کرکٹ کی تاریخ میں یہ پہلا موقع ہے کہ آئی سی سی نے کسی کے خلاف تحقیقات میں تعاون نہ کرنے پر کارروائی کی، قبل ازیں ہمارے پاس قانونی اختیار نہیں تھا اور نہ ہی کسی کے موبائل ڈیٹا تک رسائی تھی البتہ ایک برس قبل قانون میں ترمیم کی گئی تاکہ سنگین جرم کی روک تھام کی جاسکے‘۔

    آئی سی سی نے اپنے فیصلے میں لکھا کہ ’عرفان انصاری نے ضابطہ اخلاق کی خلاف ورزی کرتے ہوئے ایک کھلاڑی کو رقم کی لالچ دی اور تحقیقات کے دوران تعاون نہیں کیا جس کے تحت اینٹی کرپشن یونٹ نے اُن کے موبائل فون سے معلومات ڈاؤن لوڈ کیں تو وہ قصور وار پائے گئے‘۔

    عرفان انصاری شارجہ میں کرکٹ کلبز چلاتے تھے اور مختلف ٹیموں کی شارجہ آمد کے موقع پر نیٹ باؤلز بھی مہیا کرتے ہیں تاہم اب وہ پابندی کے بعد اسٹیڈیم کی حدود میں بھی داخل نہیں ہوسکیں گے۔

  • وسیم اکرم نے سرفراز احمد کی کپتانی کے حق میں آواز اٹھا دی

    وسیم اکرم نے سرفراز احمد کی کپتانی کے حق میں آواز اٹھا دی

    کراچی: قومی کرکٹ ٹیم کے سابق کپتان اور آل راؤنڈر وسیم اکرم نے سرفراز احمد کی کپتانی کے حق میں آواز اٹھاتے ہوئے کہا ہے کہ سرفراز کا کوئی نعم البدل ہے تو بتا دیں، شعیب ملک ورلڈ کپ کے بعد ریٹائر ہوجائیں گے۔

    کراچی میں میڈیا سے گفتگو کرتے ہوئے وسیم اکرم کا کہنا تھا کہ کپتانی صرف گراؤنڈمیں نہیں باہربھی ہوتی ہے، کپتان کو سب کچھ دیکھناہوتاہے اُسے پریس کابھی سامناکرناپڑتا ہے۔

    وسیم اکرم کا کہنا تھا کہ کپتانی کے لیے سرفرازاحمد کے علاوہ کا کوئی نعم البدل ہےتوبتادیں ، ہارجیت گیم کاحصہ ہوتی ہے ٹیم کو آخری گیندتک مقابلہ کرناچاہئے، قومی کرکٹ ٹیم کو اپنی غلطیوں سےسیکھ کرآگے کی طرف جاناچاہئے۔

    اُن کا کہنا تھا کہ نائب کپتان اصل میں مستقبل کاکپتان ثابت ہوتا ہے، سرفراز کا متبادل اس لیے نہیں مل سکتا کیونکہ سب سے موزوں شعیب ملک ورلڈ کپ کے بعد ریٹائر ہوجائیں گے، اگر شعیب کو کپتانی دینے کا سوچنا بھی تھا تو 4 سے پانچ ماہ پہلے یہ فیصلہ کرنا چاہیے تھا۔

    مزید پڑھیں: سرفراز پر چار میچز کی پابندی، آئی سی سی کے فیصلے پر پی سی بی کا ردعمل

    کراچی کنگز کے صدر کا کہنا تھا کہ جنوبی افریقاکے خلاف ون ڈےسیریز میں فتح حاصل کرنا قومی ٹیم کا بہت بڑا کارنامہ ہوگا، کھلاڑیوں کوپڑھاناپی سی بی کاکام نہیں بلکہ کھلاڑی خودتمیزسیکھتاہے، کرکٹ بورڈ صرف احتجاج ریکارڈ کراسکتا ہے۔

    اُن کا کہنا تھا کہ سرفراز احمد کے خلاف جس لفظ پر ایکشن لیا گیا اُس کا مطلب انہیں خود بھی معلوم نہیں ہے، سابق کھلاڑیوں کا شکریہ جنہوں نے جملے کی ترجمانی کی۔ وسیم اکرم کا مزید کہنا تھا کہ سرفرازاحمدکوایسےریمارکس نہیں دینےچاہیے تھے، امید ہے وہ اپنی غلطی سے سیکھیں گے اور آئندہ ایسا کوئی جملہ ادا نہیں کریں گے، سرفرازاحمد نے اپنی غلطی کی معافی بھی مانگی مگر پھر بھی اُسے سزا دی گئی۔

    یہ بھی پڑھیں: پی ایس ایل فور: پاکستان کرکٹ بورڈ نے آفیشلز کا اعلان کردیا

    سابق کپتان کا کہنا تھا کہ ڈریسنگ رومز کی باتیں باہر نہیں آنی چاہئیں، شکست پر کوچ کھلاڑیوں کو برا بھلا کہتا ہے،  شعیب ملک کو کپتانی کا اچھا تجربہ ہے مگر پاکستان کو طویل المدتی کپتان کی ضرورت ہے جس کے لیے سرفراز سے زیاد اچھا کوئی آپشن نہیں ہے مگر سرفراز کو یہ سمجھ نہیں آرہا کہ انہیں اگلا قدم کیا اٹھانا چاہیے۔

    فواد احمد کی سلیکشن

    وسیم اکرم کا کہنا تھا کہ امیدہےسلیکشن کمیٹی فواد عالم سےمتعلق کچھ سوچے گی، جنید خان کے بارے میں یہ بات مشہور کی گئی کہ وہ زخمی ہے مگر بنگلا دیشن میں جنید بہترین باؤلنگ کررہا ہے۔

    پی ایس ایل 4

    کراچی کنگز کے صدر کا کہنا تھا کہ پی ایس ایل کے 8 میچز پاکستان میں ہوں گے جن میں بڑے اسٹارز بھی کھیل کا مظاہرہ کریں گے، پاکستان سپرلیگ قوم کی لیگ ہے وہ اسے ضرور کامیاب بنائیں گے،فاتح کوئی بھی ٹیم ہو اصل جیت ملک کی ہوگی۔

  • چوتھا ون ڈے، پاکستان نے جنوبی افریقا کو 8 وکٹوں سے شکست دے دی

    چوتھا ون ڈے، پاکستان نے جنوبی افریقا کو 8 وکٹوں سے شکست دے دی

    جوہانسبرگ: پاکستان نے جنوبی افریقا کو چوتھے ون ڈے میچ میں 8 وکٹوں سے شکست دے دی، عثمان شنواری کو شاندار کارکردگی پر میچ کا بہترین کھلاڑی قرار دیا گیا۔

    تفصیلات کے مطابق پاکستان نے جنوبی افریقا کی جانب سے دیا جانے والا 165 رنز کا ہدف دو وکٹوں کے نقصان پر حاصل کرلیا، پانچ میچوں کی سیریز 2-2 سے برابر ہوگئی۔

    ہدف کے تعاقب میں پاکستان کے اوپنر نے شاندار پارٹنر شپ قائم کی، گرین شرٹس کی پہلی وکٹ 70 رنز پر گری جب فخر زمان 44 رنز بنا کر لیگ اسپنر عمران طاہر کی گیند پر کیچ آؤٹ ہوئے۔

    امام الحق 71 رنز بنا کر ربادا کی گیند پر ڈی کوک کو کیچ دے بیٹھے،  بابر اعظم نے ناقابل شکست  41 رنز بنائے، محمد رضوان 4 رنز بناکر ناقابل شکست رہے۔

    جنوبی افریقا کی جانب سے لیگ اسپنر عمران طاہر اور ربادا نے ایک، ایک وکٹ حاصل کی۔

    پاکستان اور جنوبی افریقہ کے درمیان پانچ ون ڈے میچز پرمشتمل سیریز کے چوتھے میچ میں عثمان شنواری کی شاندار باؤلنگ کی بدولت قومی ٹیم نے میزبان ٹیم کو 164 رنز تک محدود کردیا۔

     چوتھے ون ڈے میچ میں جنوبی افریقہ نے ٹاس جیت کر پہلے بیٹنگ کا فیصلہ کیا تو میزبان ٹیم کی جانب ہاشم آملہ اور کوئنٹن ڈی کوک نے اننگز کا آغاز کیا۔

    نوجوان فاسٹ باؤلرشاہین آفریدی نے شاندار باؤلنگ کرتے ہوئے 3 کے مجموعی اسکور پر کوئنٹن ڈی کوک کو ایل بی ڈبلیو کیا، وہ کوئی رنز نہ بناسکے جبکہ 18 کے مجموعی اسکور پرریزا ہینڈرکس بھی 2 رنز بنا کر آؤٹ ہوئے۔

    بعد ازاں جنوبی افریقا کی دوسری وکٹ 18 کے مجموعی اسکور پر گری، ہاشم آملہ اور کپتان ڈوپلیسی نے شراکت داری قائم کی اور اسکور 119 تک پہنچایا البتہ ڈوپلیسی شاداب خان کی گیند پر کیچ آؤٹ ہوکر پویلین گئے، عماد وسیم نے 130 کے مجموعی اسکور پر اوپنر آملہ کو کلین بولڈ کر کے پویلین کی راہ دکھائی۔

    نئے آنے والے کھلاڑی ملر صرف چار زنز کی انفرادی اننگز کھیل سکے اور وہ محمد عامر کی بال پر ایل بی ڈبلیو ہوکر پویلین روانہ ہوئے یوں 32ویں اوور میں 140 کے مجموعی اسکور پر جنوبی افریقا کی آدھی ٹیم پویلین لوٹ چکی تھی۔

    عثمان شنواری نے 38 ویں اوور میں تین بلے بازوں کو پویلین کی راہ دکھائی اور میچ کا نقشہ ہی پلٹ دیا، انہوں نے پہلے ڈوسسین، اسٹین، ربادا کی وکٹیں حاصل کیں اگلے اوور میں پاکستانی باؤلر نے ایک اور وکٹ حاصل کی۔

    مجموعی طور پر جنوبی افریقا کی ٹیم 41 ویں اوور میں 164 رنز بنا کر آل آؤٹ ہوئی، عثمان شنواری نے چار، شاہین آفریدی اور شادان خان نے 2، 2 وکٹیں حاصل کیں، میزبان ٹیم کے 7 بلے باز ڈبل فیگر میں بھی داخل نہ ہوسکے۔

    اسکور کارڈ باؤلرز کی کارکردگی

    بگ بیش کھیل کر قومی ٹیم کو جوائن کرنے والے پاکستانی باؤلر نے اپنی شاندار کارکردگی کینسر کے مریضوں کے نام کردی۔

     

    یاد رہے کہ آئی سی سی نے سرفراز احمد پر چار میچز کی پابندی عائد کردی جس کے بعد  شعیب ملک قومی کرکٹ ٹیم کی کپتانی کررہے ہیں۔

    شعیب ملک کا کہنا ہے کہ سرفرازدوسرے ون ڈے میں ہونے والے واقعے کی وجہ سے نہیں کھیل رہے، سرفرازسے متعلق آئی سی سی کا فیصلہ آنا ہے، مزید بات نہیں کرنا چاہتا۔

    دوسری جانب جنوبی افریقہ کے کپتان فاف ڈوپلیسی کا کہنا ہے کہ بتایا گیا ہے سرفرازاحمد 4 میچزکے لیے باہرہے، سرفرازاحمد سے متعلق آئی سی سی کا فیصلہ جلد آجائے گا۔

    اسکواڈ پاکستانی ٹیم

    قومی ٹیم محمد حفیظ، بابر اعظم، امام الحق، کپتان شعیب ملک، شاداب خان، حسن علی، رضوان احمد حسین طلعت، فہیم اشرف اور شاہین آفریدی پر مشتمل ہے۔

    جنوبی افریقا ٹیم اسکواڈ

    دوسری جانب جنوبی افریقہ کی ٹیم میں کوئنٹن ڈی کوک، کپتان فاف ڈوپلیسی، ہاشم آملہ، ریزا ہینڈرک، ریسی وین دیر ڈیسن، اینڈلے فلکوایو، ڈیوڈ ملر، ڈیل اسٹین، کگیسورا بادا، بیرون ہینڈرکس، اور تبریز شمسی پرمشتمل ہے۔

    ڈک ورتھ لوئس قانون: پاکستان کو جنوبی افریقا کے ہاتھوں شکست

    یاد رہے کہ دو روز قبل پاکستان اور جنوبی افریقہ کے درمیان کھیلے جانے والے تیسرے ون ڈے میچ میں ڈک ورتھ لوئس قانون کے تحت میزبان ٹیم کو 13 رنز سے فتح یاب قرار دیا گیا تھا۔

    واضح رہے کہ پانچ میچوں کی سیریز میں جنوبی افریقہ کو 1-2 کی برتری حاصل ہے۔

  • سرفراز پر چار میچز کی پابندی، آئی سی سی کے فیصلے پر پی سی بی کا ردعمل

    سرفراز پر چار میچز کی پابندی، آئی سی سی کے فیصلے پر پی سی بی کا ردعمل

    لاہور: پاکستان کرکٹ بورڈ نے انٹرنیشنل کرکٹ کونسل کے فیصلہ پر مایوسی کا اظہار کرتے ہوئے کپتان سرفراز احمد کو فوری وطن واپس بلانے کا فیصلہ کرلیا۔

    تفصیلات کے مطابق انٹرنیشنل کرکٹ کونسل نے نسل پرستانہ جملے کسنے کی پاداش میں قومی کرکٹ ٹیم کے کپتان سرفراز احمد پر چار میچز کی پابندی عائد کردی۔

    آئی سی سی نے سماجی رابطے کی ویب سائٹ ٹویٹر پراپنے پیغام میں کہا کہ سرفراز احمد پر4 میچزکی پابندی عائد کردی گئی، سرفراز احمد جنوبی افریقہ کے خلاف ون ڈے سیریز میں آج سمیت بقیہ ون ڈے اور 2 ٹی ٹوئنٹی میچز میں پاکستان کی قیادت نہیں کرسکیں گے۔

    مزید پڑھیں: آئی سی سی نے سرفرازاحمد پر4 میچوں کی پابندی لگا دی

    آئی سی سی نے ٹویٹر پر اپنے پیغام میں کہا کہ سرفراز احمد کے خلاف نسل پرستانہ جملوں پر کارروائی کی اور  وہ آئی سی سی اینٹی ریس از کوڈ کی خلاف ورزی کے مرتکب پائے گئے ہیں۔

    پاکستان کرکٹ بورڈ نے آئی سی سی کے فیصلے پر مایوس کن قرار دیتے ہوئے کپتان کو فوری وطن واپس بلانے کا فیصلہ کیا۔ پی سی بی نے اپنے جاری اعلامیے میں کہا کہ نسل پرستی پرمبنی رویےکی سخت مخالفت کرتےہیں، شعیب ملک سیریزکے باقی تمام میچز میں کپتان ہوں گے۔

    یہ بھی پڑھیں: سرفراز کی بات کا ترجمہ کیوں نہیں کیا؟ رمیز راجہ نے بتادیا

    اسے بھی پڑھیں: سرفراز کی بات کا ترجمہ کیوں نہیں کیا؟ رمیز راجہ نے بتادیا

    پاکستان کرکٹ بورڈ کے مطابق محمد رضوان کو ٹی ٹوئنٹی اسکواڈ میں بطور کپیر شامل کرلیا گیا۔

    واضح رہے کہ دوسرے ون ڈے میچ کے دوران قومی کرکٹ ٹیم کے کپتان جنوبی افریقی کھلاڑی فلک کوائیو کے خلاف سخت جملے کسنے پر تنقید کی زد میں رہے۔

  • سرفراز ون ڈے ٹیم کے کپتان مقررکردیے گئے

    سرفراز ون ڈے ٹیم کے کپتان مقررکردیے گئے

    کراچی: دبئی میں پاکستان کرکٹ بورڈ کےاعلیٰ سطحی اجلاس میں ہونے والے فیصلے میں مشکلات کا شکار اظہر علی کی جگہ ون ڈے میچز کی کپتانی سرفراز احمد کو سونپے جانے کا فیصلہ کرلیا گیا۔

    پی سی بی کے چیئرمین شہریارخان نے اےآروائی نیوز سے خصوصی گفتگو کرتے ہوئے تصدیق کی ہے کہ ٹی ٹوئنٹی کے ساتھ ون ڈے کی قیادت اب سرفراز کے ہاتھ میں ہوگی۔ان کا کہنا تھا کہ کپتانی کے سبب اظہر علی کی کارکردگی متاثر ہورہی ہے لہذا وہ چاہتے تھے کہ ان سے یہ ذمہ داری واپس لے لی جائے۔

    شہریار خان کا ٹیسٹ کرکٹ کے حوالے سے کہنا تھاکہ ٹیسٹ کے کپتان مصباح الحق نے سوچنے کے لیے بورڈ سے مزید وقت مانگا ہے۔

    سرفراز نے اب تک کل 67 ون ڈے میچز کھیلے ہیں جن میں انکا مجموعی اسکور 1498 رنز ہے اور ان کا اوسط اسکور 34.8 ہے۔ سرفراز نے دو سنچریاں اور چھ ففٹی بھی بنائی ہیں۔

    واضح رہے کہ قیادت کی تبیدیلی کا سبب آسٹریلیا میں پاکستانی ٹیم کی انتہائی خراب پرفارمنس رہی ہے جہاں سیریز کا اسکور 4-1 رہا۔دوسری جانب سرفراز جو کہ اب تک 4 ٹی ٹوئنٹی میچز میں پاکستانی ٹیم کی قیادت کرچکے ہیں اور پاکستانی ٹیم ان سب میچز میں فاتح رہی تھی۔

    یاد رہے کہ خبریں گردش کررہی تھیں کہ ٹیم کی پرفارمنس کو بہتر بنانے کے لیے کرکٹ کے تینوں فارمیٹس میں ایک کپتان ہونا چاہیے‘ تاہم ٹیسٹ کے کپتان مصباح نے کپتانی سے استعفیٰ دینے یا جاری رکھنے کے بارے میں تاحال کوئی فیصلہ نہیں کیا ہے۔

  • سرفرازاحمد کو ون ڈے ٹیم کا کپتان بنانا قبل از وقت ہوگا، وسیم اکرم

    سرفرازاحمد کو ون ڈے ٹیم کا کپتان بنانا قبل از وقت ہوگا، وسیم اکرم

    کراچی : قومی کرکٹ ٹیم کے سابق کپتان وسیم اکرم نے کہا ہے کہ سرفراز احمد کو محض ایک میچ کی کارکردگی پر ون ڈے ٹیم کا کہپتان بنانے کافیصلہ قبل از وقت ہوگا۔

    ان خیالات کا اظہار انہوں نے لیجنڈری کرکٹرحنیف محمد کےچہلم میں میڈیا سے گفتگو کرتے ہوئے کیا، چہلم کے موقع پر معین خان، سرفرازاحمد اوردیگربھی موجود تھے۔

    کراچی کی ایک جامع مسجد میں مرحوم حنیف محمد کے چہلم کے موقع پر ان کی مغفرت کے لئے دعا کی گئی۔ چہلم میں سابق قومی کپتان وسیم اکرم اور معین خان نے خصوصی شرکت کی،

    سرفراز احمد نے حنیف محمد کو خراج عقیدت پیش کرتے ہوئے لٹل ماسٹر کے نام سے کرکٹ اکیڈمی قائم کرنے کا مطالبہ بھی کیا۔

    میڈیا سے گفتگو کرتے ہوئے وسیم اکرم نے کہا کہ حنیف محمد پاکستان کی کرکٹ کا بہت بڑا نام ہے، ان کی خدمات کو کبھی فراموش نہیں کیا جاسکتا۔

    وسیم اکرم نے مزید کہا کہ سرفرازاحمد کی کپتان کےبارے میں کچھ کہنا قبل از وقت ہوگا۔ وسیم اکرم کا کہنا تھا کہ سرفراز احمد میں قائدانہ صلاحیتیں موجود ہیں لیکن صرف ایک میچ کی کارکردگی پر ون ڈے ٹیم کا کپتان مقرر کرنا درست فیصلہ نہیں ہو گا۔

    سرفرازکا اصل امتحان ویسٹ انڈیز کے خلاف میچ میں ہوگا۔ اظہر علی کی حمایت کا اعادہ کرتے ہوئے انہوں نے کہا کہ ون ڈے کپتان کو تیس پینتیس میچزکی قیادت کا موقع ملنا چائیے۔ انہوں نے کہا کہ اظہر علی کو کارکردگی دکھانے کے لیے مزید وقت ملنا چاہئیے۔