Tag: sarfraz ahmed score century

دبئی : نیوزی لینڈ اور پاکستان درمیان جاری دبئی ٹیسٹ کے چوتھے روز کا کھیل اختتام پزیرہوگیا،نیوزی لینڈ کی ٹیم کو پاکستان کیخلاف دوسری اننگز میں مشکلات درپیش ہیں، یاسر شاہ اور ذوالفقار بابر کی بولنگ پاکستان کو مضبوط پوزیشن میں لے آئی ہے۔

دبئی ٹیسٹ کے چوتھے روز پاکستان نے پہلی نامکمل اننگز دو سو اکیاسی رنز چھ کھلاڑی آؤٹ سے دوبارہ شروع کی۔ ٹیل اینڈرز کیساتھ ملکر وکٹ کیپر سرفراز احمد نے اسکور میں اضافہ کیا۔ آخری وکٹ کی شراکت میں سرفراز احمد نے راحت علی کیساتھ ملکر اسکور میں اکیاسی رنز جوڑے اور کیریئر کی تیسری سنچری بنائی، برینڈن میک کلم نے سرفراز احمد کو ایک سو بارہ رنز پر آؤٹ کرکے پاکستان کی اننگز تین سو ترانوے رنز پر ختم کردی۔

پہلی اننگز میں نیوزی لینڈ کو دس رنز کی سبقت حاصل رہی۔ ٹم ساؤتھی نے تین،ٹرینٹ بولٹ اور اش سودھی نے دو دو وکٹیں حاصل کیں۔۔ دوسری اننگز میں نیوزی لینڈ کو مشکلات کا سامنا کرنا پڑ رہا ہے، ذوالفقار بابر اور یاسر شاہ کی بولنگ کے سامنے کیوی بیٹسمین سنبھل کر کھیلنے میں ناکام ہوگئے ہیں، دن کے اختتام تک نیوزی لینڈ نے چھ وکٹوں پر ایک سو سرسٹھ رنز بنالیے اور پاکستان کیخلاف ایک سو ستتر رنز کی سبقت حاصل ہے۔

دبئی : دبئی ٹیسٹ میں مشکل وقت میں پاکستان کرکٹ ٹیم کے وکٹ کیپر بیٹسمین سرفراز احمد نے تیسری ٹیسٹ سنچری اسکور کر تے ہوئے میچ میں ٹیم کی پوزیشن مستحکم کردی ہے۔

دبئی ٹیسٹ کا چوتھا روز سرفراز احمد کے نام رہا، سرفراز نے کمان سنبھالی تو ٹیم مشکلات میں گھری ہوئی تھی، نیوزی لینڈ کا پلڑا بھاری تھا لیکن وکٹ کیپر بیٹسمین نے کیوی بولرز کے سامنے بھرپور مزاحمت کی اور ہمت نہیں ہارے، ایک اینڈ سے وکٹیں گرتی رہیں لیکن سرفراز احمد نہ رکے۔

سرفراز احمد کی وکٹ حاصل کرنے کیلئے کیوی کپتان نے تمام حربے آزمائے لیکن ناکام ہوئے، سرفراز آگے بڑھتے گئے اور اسکور بناتے گئے، سرفراز احمد نے پندرہ چوکوں کی مدد سے کیرئیر کی تیسری سینچری اسکور کی۔

سرفراز رواں سال سب سے زیادہ رنزبنانے والے وکٹ کیپر بھی بن گئے،  مشکل وقت میں سرفراز کی ذمہ دارنہ بیٹنگ ٹیم کو میچ میں واپس لے آئی۔