ARYNews.tv | Urdu – Har Lamha Bakhabar

Tag: Sasti Roti

  • پنجاب میں گریڈ ایک سے چار تک ملازمتوں پر پابندی ختم، سستی روٹی اتھارٹی کا خاتمہ

    پنجاب میں گریڈ ایک سے چار تک ملازمتوں پر پابندی ختم، سستی روٹی اتھارٹی کا خاتمہ

    لاہور : پنجاب میں گریڈ ایک سے چار تک کی ملازمتوں پر عائد پابندی ختم کردی گئی، سستی روٹی اتھارٹی کا خاتمہ اور ٹریفک لائسنس فیس میں کمی کے ساتھ جرمانے بڑھانے کی منظوری دے دی گئی۔

    تفصیلات کے مطابق حکومت پنجاب نے صوبے کے بیروزگار نوجوانوں کو خوشخبری سنادی، گریڈ ایک سے چار کی ملازمتوں پر پابندی ختم کردی گئی، صوبائی فنانس کمیشن قائم، سستی روٹی اتھارٹی ختم، کابینہ نے ٹریفک لائسنس فیس میں کمی اور جرمانے بڑھانے کی منظوری دے دی۔

    وزیر اعلی پنجاب عثمان بزدار کی زیر صدارت پنجاب کابینہ کے اجلاس میں 24 نکاتی ایجنڈے کی منظوری دے دی گئی، کابینہ نے صوبائی فنانس کمیشن کی منظوری دی جس کے سربراہ وزیر خزانہ ہوں گے۔

    کابینہ نے سستی روٹی اتھارٹی بند اور اسپیشل آڈٹ کی اجازت بھی دے دی۔ اس کے علاوہ بزدار سرکار نے پنجاب کے بے روزگار نوجوانوں کو سرکاری ملازمتوں کے حوالے سے بھی بڑی خوشخبری سنا دی۔

    اس سلسلے میں گریڈ ایک سے چار تک کی ملازمتوں سے پابندی ہٹانے کا فیصلہ کیا گیا، پنجاب کابینہ نے ٹریفک لائسنس کی فیس کم جبکہ ٹریفک خلاف ورزیوں کے جرمانے بڑھانے کی منظوری بھی دی۔

    پنجاب کابینہ نے بارڈر ملٹری رولز میں ترامیم اور راولپنڈی یونیورسٹی آف ٹیکنالوجی کے قیام کی منظوری دی، کابینہ میں ڈینگی وبا کا معاملہ بھی زیر غور رہا۔

    ڈینگی کے حوالے سے وزیراعلی پنجاب نے وزراء کو کھلی کچہریاں لگانے اور رپورٹس وزیراعلی سیکرٹریٹ میں جمع کروانے کی ہدایات دیں۔

  • پنجاب میں ہرشعبہ زوال کا شکار ہے، پرویزالٰہی

    پنجاب میں ہرشعبہ زوال کا شکار ہے، پرویزالٰہی

    لاہور : پاکستان مسلم لیگ ق کے مرکزی رہنماء چودھری پرویز الٰہی نے کہا ہے کہ لاہور میں ہر شعبے میں حالات بدترین ہوتے جارہے ہیں، نمائشی اسکیموں کی فاتحہ پڑھنے کے بعد سود کی ادائیگی کی جارہی ہے، ہر شعبہ زوال کا شکار ہے۔

    ان خیالات کا اظہار انہوں نے لاہور میں میڈیا سے گفتگو کرتے ہوئے کیا، پرویز الٰہی نے شریف برادران پر تنقید کرتے ہوئے کہا کہ وزیر اعظم کا چھوٹا بھائی سرکاری اسپتال اور اسکول ٹھیکے پر دے رہا ہے اور سستی روٹی اسکیم کے نام پر بینکوں کو سود ادا کیا جارہا ہے۔

    پرویز الہٰی کا کہنا تھا کہ ہمارے شروع کیے گئے منصوبوں کو پنجاب میں ادھورا چھوڑدیا گیا ہے، جو کہتے ہیں کہ ہم مارشل لاء کی پیداوار ہیں تو وہ اپنی معلومات ٹھیک کرلیں، ہم اس وقت سے سیاست میں ہیں جب ان لوگوں نے سیاست کے بارے میں سوچا بھی نہیں ہوگا۔

    بھٹو صاحب کے دور میں بھی ہم نے صعوبتوں کا مقابلہ کیا ہے، الزامات لگانے والے ثبوت دیں تو میں سیاست چھوڑ دوں گا۔

    انہوں نے کہا کہ پنجاب کے اسپتالوں میں ادویات ہیں نہ ضروری آلات اور نہ ہی مریضوں کیلئے کوئی سہولیات، انہوں نے کہا کہ پیلی ٹیکسی اسکیم کے بعد نیلی اسکیم بھی فیل ہوگئی ہے۔