ریاض : سعودی عریبین مانیٹری اتھارٹی (ساما ) کی رپورٹ میں کہا گیا ہے کہ سعودی بینکوں میں ملازمین کی تعداد میں اضافہ ہوا ہے، گزشتہ سال سعودی بینکوں سے ریکارڈ مالیت کی رقوم نکالی گئیں۔
تفصیلات کے مطابق سعودی عریبین مانیٹری اتھارٹی (ساما ) سعودی عرب میں مالیاتی و اقتصادی تبدیلیوں سے متعلق اپنی 56 ویں رپورٹ جاری کی ہے جس میں بتایا گیا کہ2019 کے دوران بینکوں کے کارکنان کی تعداد میں0.1 فیصد کا اضافہ ہوا ہے۔
ساما کی رپورٹ کے مطابق سال2019میں بینکوں کے کارکنان کی تعداد 47.181 ریکارڈ کی گئی۔ ان میں سے94.3 فیصد سعودی شہری ہیں۔
سعودی ذرائع ابلاغ کے مطابق ساما نے اپنی رپورٹ میں مزید کہا کہ 2019 کے دوران سعودی اے ٹی ایم نیٹ ورک مدی سے983ملین آپریشنز کے ذریعے 468.8 ارب ریال نکالے گئے۔
یاد رہے کہ اس سے قبل سعودی عریبین مانیٹری اتھارٹی (ساما ) نے کہا تھا کہ کمرشل بینکوں کو2019 کے دوران 50.3 ارب ریال کا منافع ہوا اور یہ 2018 کے مقابلے میں 4.5 فیصد زیادہ ہے، اس وقت کمرشل بینکوں کو 48.1 ارب ریال کا منافع ہوا تھا۔
