Tag: Saudi Consulate

اسلام آباد : سعودی سفارتخانے میں عمرہ ویزا اسٹیکرز کی شدید قلت کے باعث بحران شدت اختیار کرگیا، رمضان المبارک میں عمرے کی سعادت ہزاروں پاکستانیوں کے لیے حسرت بن کر رہ گئی، عمرہ زائرین ، ٹریول ایجنٹس اور ایئر لائنز کو کروڑوں روپے نقصان کا سامنا ہے۔

تفصیلات کے مطابق سعودی سفارت خانہ اسلام آباد اور کراچی سعودی قونصلیٹ میں سعودی حکام نے روزانہ کی بنیاد پر پاسپورٹس کی وصولی میں کمی کررکھی ہے اور اس کی وجہ ویزا اسٹیکرز کی کمی بتائی گئی ہے۔

دو ہفتے گزرنے کے بعد بحران مزید سنگین

اس کمی کے جلد پورا ہونے کے بعد معمول کے مطابق پاسپورٹس کی وصولی کی یقین دہانی کروائی گئی تاہم اب تقریباً دو ہفتے گزرنے کو ہیں مگر صورتحال بہتر ہونے کے بجائے مزید سنگین ہوگئی ہے۔

رمضان المبارک میں عمرے کی سعادت کے لیے ہزاروں پاکستانی سال بھر پہلے جانے کی منصوبہ بندی کرتے ہیں اور اس سلسلے میں ایئر لائنز سے ٹکٹ بھی ایڈوانس خرید لیتے ہیں، مختلف ایئر لائنز رمضان المبارک کے لیے نان ریفنڈ ایبل ٹکٹ آفر کرتی ہیں جو کہ کم ریٹ کی وجہ سے خرید لیے جاتے ہیں۔

سعودی حکومت کی جانب سے اس سال اعلان کیا گیا تھا کہ عمرہ ویزا اوپن کردیا گیا ہے اور اس حوالے سے کسی قسم کا کوٹا نہیں لگایا جائے گا لہذا ہزاروں افراد نے مختلف ایئر لائنز سے اپنی بکنگ کروائی اور ٹکٹ خرید لیے، سعودی وزارت حج اور سعودی وزارت خارجہ کی جانب سے بھی پاکستان کےلیے رمضان المبارک میں دو لاکھ سے زائد ویزوں کی منظوری دی جاچکی ہے جس کے لیے پاکستان کی عمرہ کمپنیوں نے سعودی عمرہ کمپنیوں کو کروڑوں روپے کی ادائیگی بھی کی ہے۔

ویزا اسٹیکرکا بہانہ، پاسپورٹ وصولی انتہائی محدود

اب صورتحال یہ ہے کہ سعودی سفارتخانہ اسلام آباد اورکراچی قونصلیٹ نے عمرہ ویزا کی اسٹمپنگ کے لیے ویزا اسٹیکرز کی کمی کو بہانہ بنا کر پاسپورٹ وصولی کو انتہائی محدود کردیا ہے۔

سعودی سفارتخانے نے اسلام آباد، راولپنڈی ،پنجاب کے دیگر شہروں اور کے پی کے کے لیے 8 ڈراپ باکسز قائم کیے ہیں ان ڈراپ باکسز کا روزانہ کی بنیاد پر کوٹا 4 سے 5 ہزار پاسپورٹ جبکہ اتنی ہی تعداد کا کوٹا کراچی سمیت سندھ کے دوسرے شہروں اور بلوچستان کےلیے تھا۔

یومیہ 8 سے 10 ہزار کے بجائے چند سو پاسپورٹ کی وصولی

اس وقت سعودی حکام معمول کے مطابق روزانہ 8 ہزار سے 10 ہزار پاسپورٹس کے بجائے محض چند سو پاسپورٹس وصول کررہے ہیں۔

ریاض میں سعودی حکام کو کئی بار آگاہ کرچکے، عمرہ کمپنیاں

اس سلسلے میں عمرہ کمپنیوں کے نمائندوں نے اسلام آباد میں سعودی عرب کے نائب سفیر سے رابطہ کیا تو انہوں نے اپنی بے بسی ظاہر کرتے ہوئے بتایا کہ اس حوالے سے سفارت خانہ ریاض میں سعودی وزارت خارجہ کو کئی بار آگاہ کرچکا ہے۔

پاکستانی عمرہ کمپنیوں اور عمرہ زائرین نے وزیراعظم اور وزارت خارجہ سے پرزور اپیل کی ہے کہ وہ صورتحال کا نوٹس لیں اور فوری طورپر سعودی حکام سے رابطہ کرکے اس بحران کو ختم کرنے کے لیے اقدامات کریں۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں ۔