ریاض: سعودی عرب کی مجلس شوریٰ نے ہدایات جاری کی ہیں کہ مملکت میں ذہنی صحت کے لیے کام کرنے والے مراکز کو جدید خطوط پر استوار کیا جائے۔
اردو نیوز کے مطابق سعودی مجلس شوریٰ نے فروغ ذہنی صحت کے قومی مرکز سے مطالبہ کیا ہے کہ وہ وزارت تعلیم کے ساتھ یکجہتی پیدا کر کے اسکالر شپ کی حکمت عملی کا پلان تیار کرے۔
مجلس شوریٰ نے سوموار کو نائب صدر ڈاکٹر مشعل السلمی کی زیر صدارت ایوان میں سال رواں کا انیتسواں اجلاس منعقد کیا۔
شوریٰ نے مذکورہ مطالبہ فروغ ذہنی صحت کے قومی مرکز کی جانب سے مالی سال 23-2022 کی سالانہ رپورٹ پر صحت کمیٹی کی رپورٹ سننے کے بعد کیا۔
شوریٰ نے فروغ ذہنی صحت مرکز سے مطالبہ کیا کہ وہ اپنے ذرائع آمدن کے فروغ کی اسکیم تیار کرے اور اس سلسلے میں پرائیویٹ سیکٹر نیز محکمہ اوقاف اور بغیر منافع والے سیکٹر کے ساتھ یکجہتی اور شراکت کا اہتمام کرے۔
شوریٰ نے فروغ ذہنی صحت کے مرکز سے کہا کہ وہ اپنے انتظامی ڈھانچے پر نظر ثانی کرے اور اپنے اداروں کے نام ان کی ذمہ داریوں کے مناسب حال رکھے۔
ارکان شوریٰ نے رپورٹ سننے کے بعد اپنے تاثرات اور تجاویز کا اظہار کیا، رکن شوریٰ فضل البوعنین نے جبیل اور ینبع رائل کمیشن سے مطالبہ کیا کہ وہ متعلقہ اداروں کے ساتھ یکجہتی پیدا کر کے ینبع انڈسٹریل سٹی میں صنعتی سرمایہ کاری میں کمی کے چیلنج سے نمٹنے کا اہتمام کرے۔
ایسی جامع حکمت عملی تیار کی جائے جس کی بدولت ینبع انڈسٹریل سٹی صنعت کاروں کے لیے پرکشش بن جائے۔
ایک اور رکن شوریٰ ناصر الدغیثر نے کہا کہ رائل کمیشن متعلقہ اداروں کے ساتھ یکجہتی پیدا کر کے اپنے یہاں سیاحتی، ثقافتی پروگرام اور کھیلوں کے انتظامات کرے تاکہ سرمایہ کار اور سیاح کثیر تعداد میں ینبع انڈسٹریل سٹی آئیں۔
سعودی شہروں کی تاریخ و ثقافت سے واقف ہوں اور انہیں معلوم ہو کہ شہروں نے کس طرح مرحلہ وار ترقی کی، اس سلسلے میں جدید ابلاغی حکمت عملی اپنائی جائے جس کی مدد سے منفرد قومی کارناموں کو اجاگر کیا جائے۔
