کراچی: انسدادِ دہشت گردی کی عدالت نے صولت مرزا کے ڈیتھ وارنٹ جاری کر دیئے ییں، صولت مرزا کو مچھ جیل میں بارہ مئی کو پھانسی دی جائے گی۔
سولہ سال سے پھانسی کے منتظر مجرم صولت مرزا کو بارہ مئی کو تختہ دار پر لٹکایا جائے گا، انسدادِ ہشتگردی کراچی کی عدالت نے تیسری بار صولت مرزاکے ڈیتھ وارنٹ جاری کردیئے، ڈیتھ وارنٹ پر عمل ہوا تو صولت مرزا کو مچھ جیل میں سولی پر چڑھایا جائے گا۔
صولت مزرا کو انیس مارچ کو پھانسی دی جانی تھی تاہم مجرم کے تہلکہ خیز ویڈیو بیان کے بعد پھانسی پر عملدرآمد ابتدائی طور پر باہتر گھنٹے کیلئے موخر کردیا، جس کے بعد یکم اپریل کیلئے ڈیتھ وارنٹ جاری کئے گئے۔
یاد رہے کہ صولت مرزاکے انکشافات کے بعد جے آئی ٹی ٹیم نے مچھ جیل جاکر مجرم سے مزید تفتیش کا فیصلہ کیا۔ جس کے بعد یکم اپریل کو وزارت داخلہ کی سفارش پرصولت مرزاکی پھانسی پر عملدرآمد مزید ایک ماہ کے لئے موخر کر کے تیس اپریل کے ڈیتھ وارنٹ جاری کئے گئے تھے۔
اس سے قبل شاہد حامد قتل کیس کے مجرم صولت مرزا نے سندھ ہائی کورٹ کو چار خطوط لکھے ہیں جن میں کہا ہے کہ انکی اہلیہ کو جنوبی افریقہ سے دھمکی آمیز فون آرہے ہیں، عدالت اہلیہ اور خاندان کو تحفظ فراہم کرے۔
سندھ ہائی کورٹ کو لکھے گئے خطوط میں صولت مرزا نے کہا ہے کہ ان کی اہلیہ کو جنوبی افریقہ سے دھمکی آمیز ٹیلیفون کالز آر ہی ہیں ، انکی اہلیہ کال کرنےو الوں کو جانتی ہیں۔
اس لئےمتعلقہ ایس ایس پی ان کی اہلیہ کا بیان قلم بند کریں اورملزمان کیخلاف کاروائی عمل میں لائی جائے صولت مرزا نے مطالبہ کیا ہے کہ دھمکی آمیز کالز کرنے والوں کے کے ناقابل ضمانت وارنٹ جاری کئے جائیں۔
انہوں نے اپنی بیوی اور اہلہ خانہ کو تحفظ فراہم کرنے کی بھی درخواست کی ہے اور کہا ہے کہ جب تک اس مسئلہ کی تفتیش مکمل نہیں ہوجاتی ان کی سزا پر عمل درآمد موخر کیا جائے۔
سندھ ہائی کورٹ ذرائع کے مطابق عدالت کے رجسٹرار نے خط اعتراض لگا کر واپس کر دئے ہیں اور صولت مرزا سے کہا گیا ہے کہ عدالتیں خطوط پر کارروائی نہیں کرتیں، صولت مرزا عدالتی کاروائی چاہتے ہیں تو عدالتی طریقہ کار استعمال کیا جائے۔
واضح رہے کہ صولت مرزا کو 1999 ء میں چوہدری اسلم شہید نے گرفتار کیا تھا، جس کے بعد صولت مرزا کو عدالت نے کے ای ایس سی کے ایم ڈی اور ان کے ساتھیوں کے قتل کے جرم میں پھانسی کی سزا سنائی تھی۔
