اسلام آباد: وفاقی وزیرِداخلہ چوہدری نثارعلی خان کا کہنا ہے کہ کسی بھی این جی او کو اچھے کاموں کی چھتری تلے غلط اور غیرقانونی کام کرنے کی اجازت نہیں دی جائے گی۔

تفصیلات کے مطابق آج بروز جمعہ چوہدری نثار نے میڈیا سے گفتگو کرتے ہوئے کہا کہ جس این جی او پر پابندی عائد کی گئی ہے وہ حکومتِ پاکستان کی جانب سے مجوزہ دائرہ کار سے باہرکام کررہی تھی۔

ان کا کہنا تھا کہ این جی اوز کو پاکستانی کی خودمختاری کا ہرصورت احترام کرناہوگا، چوہدری نثار نے مزید کہا کہ پاکستان میں کام کرنے والی کچھ این جی اوز ملک کے خلاف کام کررہی ہے۔

وفاقی وزیرِداخلہ نے واضح الفاظ میں پاکستان میں کام کرنے والی این جی اوزاورعالمی دنیا کو پیغام دیا کہ پاکستان کی قومی سلامتی پرکسی صورت سمجھوتا نہیں کیا جائے گا۔

یاد رہے کہ گزشتہ شام دفتری اوقات کے بعد حکومتی انتظامیہ کے ذمہ دارحکام پولیس کے ہمراہ پابندی کا شکار ہونے والی این جی او کے اسلام آباد کے قلب میں واقع دفترپہنچے اور دروازے پر تالا لگا کر نوٹس چسپاں کردیا کہ یہ عمارت سیل ہے۔

چوہدری نثار نے شفقت محمود کی پھانسی کے حوالے سے کہا کہ کچھ مقامی این جی اوزعالمی دنیا کوغلط معلومات اوراعداد وشمار فراہم کررہی ہیں جن سے پاکستان کی بد نامی ہورہی ہے۔

انہوں نے یہ بھی کہا کہ جس وقت شفقت حسین نے بچے کو قتل کیا اس وقت اس کی عمر 23 سال تھی جو کہ ثابت ہوچکا ہے اور اس کی پھانسی ہرحال میں ہوگی۔

ان کا کہنا تھا کہ شفقت حسین کی پھانسی روکے جانے کے معاملے کی تحقیقات بھی ہوں گی۔